Буюк Британия озиқ-овқат етишмовчилигига тайёрланмоқда. Агар Франция коронавируснинг янги турининг тарқалишини тўхтатиш учун Британия билан юк ва йўловчи ташишга тақиқ қўйса, ишлаб чиқарувчилар фаолияти тўхташи мумкин. Бу ҳақда «Интерфакс» маълум қилди.

Фото: EPA

Франция ҳукуматининг 20 декабрь куни кечқурун эълон қилган қарори билан кунига 10 мингтагача юк машинасини қабул қиладиган Дувр ва Кале каби портлар ўртасидаги савдо-сотиқ тўхтади. Буюк Британия ва Францияни боғлайдиган Евротуннелнинг оператори ҳам барча турдаги юк ва йўловчи ташишни тўхтатди.

Франция Буюк Британия билан чегарасини 48 соатга ёпди ва саёҳат тақиқи Буюк Британия вақти билан 22 декабрь куни 23:00 да тугайди.

Шунингдек, Нью-Йорк губернатори Эндрю Куомо авиакомпанияларни Буюк Британиядан келаётган самолётга чиқишдан олдин йўловчиларни коронавирусга текширишга чақирди. British Airways ва Delta Air Lines ушбу тадбирларга аллақачон рози бўлган.

Sky News хабар беришича, Буюк Британия Франция расмийлари билан юк ташишни тиклаш учун юк машиналари ҳайдовчиларини оммавий тестдан ўтказиш имкониятини муҳокама қилмоқда. 21 декабрь куни Пас-де-Кале шаҳридан Лондонга йўл оладиган 900 дан ортиқ юк машинаси тўпланиб қолган.

Таъминот билан боғлиқ муаммолар

«Юк ташишдаги чеклов Рождество байрами фонида янги маҳсулотлар етишмовчилигига олиб келиши мумкин», – дейди Ян Райт, Буюк Британияда жойлашган Food & Drink Federation савдо ташкилоти бош ижрочи директори. «Европалик юк машиналари ҳайдовчилари, агар ҳақиқатан ҳам тақиқ қўйилишидан қўрқса, Буюк Британияга боришни хоҳламайди», – дея иқтибос келтирган The Wаll Street Journal.

Буюк Британиянинг иккинчи йирик супермаркетлари тармоғи бўлган J Sainsbury PLC, агар вазият ҳал этилмаса, яқин кунларда дўконларида баъзи мева ва сабзавотлар етишмовчилиги кузатилиши мумкинлигини айтди.

Мамлакатдаги бошқа компаниялар эса Европадаги харидорларга маҳсулот етказиб беролмаймиз, дея хавотир билдирмоқда.

Британиянинг Engineering аnd Machinery Alliance савдо ташкилоти раҳбари Жек Семплнинг айтишича, кўплаб ишлаб чиқарувчилар захираларга эга, аммо таъминот занжирлари Европа билан шу қадар боғланиб кетганки, ҳозирги вазият хавотирланишга етарлича арзийди.

Коронавируснинг янги штамми

Буюк Британияда коронавируснинг янги тури аниқлангани, шу туфайли мамлакатнинг айрим ҳудудларида касаллик тарқалиш суръати тезлашгани ҳақида 14 декабрь куни маҳаллий Соғлиқни сақлаш вазирлиги раҳбари Мэтт Хенкок маълум қилди. Буюк Британия бош вазири Борис Жонсоннинг сўзларига кўра, ушбу турдаги коронавирус аввалгиларидан 70 фоизга юқумлироқ, лекин ундан хавфлироқ эмас.

Жаҳон соғлиқни сақлаш ташкилоти 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Ҳозирда ташкилот бу штаммни ўрганмоқда.

Аввалроқ Жанубий Африка Республикаси (ЖАР)да ҳам ўхшаш мутациядаги вирус топилгани ҳақида хабар берилган эди. Вируснинг янги варианти ҳозирги вакциналар ҳосил қиладиган иммунитетдан кучлироқ бўлиши мумкин, деган тахминлар учун ҳозирча бирор-бир асос йўқ. Буюк Британия 8 декабрь куни Ғарб мамлакатлари орасида биринчилардан бўлиб коронавирусга қарши Pfizer ва BioNTech компаниялари томонидан ишлаб чиқилган дори воситаси билан оммавий вакцинация қилишни бошлаган эди.

Европанинг бир қатор мамлакатлари — Нидерландия, Бельгия, Австрия ва Италия кабилар Буюк Британия билан авиақатновларни тўхтатишини эълон қилиб улгурди. Ирландия, Франция ва Германия, шунингдек, Исроил ҳам шундай қарор қабул қилиш масаласини кўриб чиқмоқда. Bild нашри маълумотларига кўра, Германия канцлери Ангела Меркель Европа Иттифоқидаги ҳамкасблари билан Буюк Британиядан Евроиттифоққа парвозларни 20 декабрь оқшомидан то 2021 йил 6 январигача мувофиқлаштирилган ҳолда тақиқлаш бўйича келишишни режалаштирмоқда. Бундан ташқари, Европа Иттифоқи ва ЖАР ўртасидаги авиақатновлар чекланиши, Буюк Британия билан темир йўл ва паром алоқаси ҳам тўхтатилиши мумкин.

Шунингдек, янги штамм сабаб Саудия АрабистониРоссия ва 20 дан ортиқ мамлакат авиақатновларни чеклади. Шу жумладан, Ўзбекистон ҳам етти давлат билан авиарейсларни тўхтатди.