Москва шифокорларининг ярмидан кўпи аллақачон коронавирус билан касалланиб соғайган. Бу ҳақда шаҳар мэри Сергей Собянин маълум қилди, деб хабар бермоқда Meduza, «ТАСС»га таяниб.
«Москвадаги барча шифокорларнинг ярми коронавируснинг оғир ёки симптомсиз кўринишида касалланиб соғайди, десам хато қилмаган бўламан», — деган у.
Москва мэри ва ҳукумати матбуот хизматининг «Интерфакс»га хабар беришича, коронавирус билан оғриган беморларга ёрдам кўрсатишга 69 мингдан ортиқ тиббиёт ходимлари, хусусан, шифокорлар, ўрта ва кичик тиббиёт ходимлари, ҳамширалар ва тез ёрдам ҳайдовчилари жалб этилган.
Федерал тезкор штаб маълумотларига кўра, Москвада пандемия бошланганидан бери 743 мингдан ортиқ киши COVID-19’га чалингани аниқланган. Уларнинг 572 мингдан ортиғи соғайган, 10 469 нафари вафот этган.
Аввалроқ Сергей Собянин шаҳар аҳолисининг қанчаси коронавирусга чалиниб чиққанини маълум қилганди. Шунингдек, шаҳар аҳолисининг 7 млн нафари COVID-19’га қарши эмланиши кераклигини айтган.
Москвада коронавирус инфекцияси тарқалиши туфайли жорий қилинган бир қатор чеклов чоралари 2021 йил 15 январгача узайтирилган.
Изоҳ (0)