«Арсенал» етакчиси ва тўпурари Пьер-Эмерик Обамеянгнинг ҳашаматли ҳаёти ҳақида ҳикоя қиламиз.
Уйи
Обамеянг Лондон шаҳрининг ўзида жойлашган 16 миллион евролик ҳашаматли уйда яшайди.
У ерда яхши ҳаёт кечириш учун барча қулайлик ва жиҳозлар етарли: бассейн, спорт зали ва кинотеатр, ётоқхона, меҳмонхона, ошхона ва улкан боғ. Бироқ бойлар ҳам муаммолардан холи эмас деганларидек, Обамеянгни Лондонга келганидан бери гараж масаласи қийнаб келади. Буни «муаммо» деб аташга нима сабаб бўлганини эса қуйида билиб оласиз...
Машиналари
Габонлик футболчининг нозик жойи машиналар бўлиб, у уларга муккасидан кетганига ҳеч шубҳа йўқ. У гаражидаги машиналар коллекцияси борасида кимсан Криштиану Роналду билан ҳам мусобақалаша олади. Обамеянгнинг автопаркидан Lamborghini Urus, Ferrari 488 Spider, Ferrari 458 Italia, иккита Porsche Panamerа, Aston Martin DB9, Audi R8 Range Rover Sport, Lamborghini Aventador LP700, Lamborghini Huracan ва Ferrari 812 Superfast каби машиналар ўрин олган.
Бундан ташқари унинг шахсий самолёти борлиги ҳам айтилади. У ушбу «темир қуш»да оиласи билан саёҳат қилишни ёқтиради.
Шахсий ҳаёти
Четдан қараганда тартибсиз ва шўх йигитни эслатадиган Обамеянг аслида намунали оилапарвар инсон. Пьер имкон қадар оиласи ҳақидаги маълумотларни ошкор этмасликка ҳаракат қилади. Шунга қарамай унинг болаликдаги дўсти Алиша исмли қизга уйлангани аниқ. 2011 ва 2016 йилларда эса жуфтлик икки бор ўғил фарзандли бўлган. Футболчи асосий вақтини айнан рафиқаси ва фарзандлари билан ўтказади.
Дўстлари
Пьер қувноқ ва шунчалик мулойим инсонки, қаерда ўйнамасин, ҳамма жойда дўст орттиришга муваффақ бўлади. Унинг энг яқин дўсти Генрих Мхитарян бўлиб, улар даставвал «Боруссия Д», кейинчалик «Арсенал»да бирга тўп тепишган. Ҳозирда арманистонлик Италияга («Рома») жўнаб кетган бўлса ҳам, бу уларнинг дўстлигига таъсир ўтказмаган. Дўстлар мунтазам равишда бир-бирлари ҳақида илиқ сўзларни айтиб келади.
Шунингдек, Бундеслигада ўйнаб юрган кезлари Эмерик Марко Ройс билан ҳам анча яхши чиқишиб қолган.
«Арсенал»да эса у асосан, Александер Ляказетт билан мулоқот қилади.
Даромади
Бўш вақтларида саёҳат қилиш ва соч парваришига алоҳида эътибор берадиган Обамеянгнинг «Арсенал»даг ҳафталик маоши 250 минг фунтга тенг. Бу йилига ҳисобланганда, тахминан, 13 миллион фунтни ташкил қилади. Бундан ташқари унда реклама шартномалари ҳам мавжуд.
Изоҳ (0)