“Arsenal” yetakchisi va to‘purari Pyer-Emerik Obameyangning hashamatli hayoti haqida hikoya qilamiz.
Uyi
Obameyang London shahrining o‘zida joylashgan 16 million yevrolik hashamatli uyda yashaydi.
U yerda yaxshi hayot kechirish uchun barcha qulaylik va jihozlar yetarli: basseyn, sport zali va kinoteatr, yotoqxona, mehmonxona, oshxona va ulkan bog‘. Biroq boylar ham muammolardan xoli emas deganlaridek, Obameyangni Londonga kelganidan beri garaj masalasi qiynab keladi. Buni “muammo” deb atashga nima sabab bo‘lganini esa quyida bilib olasiz...
Mashinalari
Gabonlik futbolchining nozik joyi mashinalar bo‘lib, u ularga mukkasidan ketganiga hech shubha yo‘q. U garajidagi mashinalar kolleksiyasi borasida kimsan Krishtianu Ronaldu bilan ham musobaqalasha oladi. Obameyangning avtoparkidan Lamborghini Urus, Ferrari 488 Spider, Ferrari 458 Italia, ikkita Porsche Panamera, Aston Martin DB9, Audi R8 Range Rover Sport, Lamborghini Aventador LP700, Lamborghini Huracan va Ferrari 812 Superfast kabi mashinalar o‘rin olgan.
Bundan tashqari uning shaxsiy samolyoti borligi ham aytiladi. U ushbu “temir qush”da oilasi bilan sayohat qilishni yoqtiradi.
Shaxsiy hayoti
Chetdan qaraganda tartibsiz va sho‘x yigitni eslatadigan Obameyang aslida namunali oilaparvar inson. Pyer imkon qadar oilasi haqidagi ma’lumotlarni oshkor etmaslikka harakat qiladi. Shunga qaramay uning bolalikdagi do‘sti Alisha ismli qizga uylangani aniq. 2011 va 2016-yillarda esa juftlik ikki bor o‘g‘il farzandli bo‘lgan. Futbolchi asosiy vaqtini aynan rafiqasi va farzandlari bilan o‘tkazadi.
Do‘stlari
Pyer quvnoq va shunchalik muloyim insonki, qayerda o‘ynamasin, hamma joyda do‘st orttirishga muvaffaq bo‘ladi. Uning eng yaqin do‘sti Genrix Mxitaryan bo‘lib, ular dastavval “Borussiya D”, keyinchalik “Arsenal”da birga to‘p tepishgan. Hozirda armanistonlik Italiyaga (“Roma”) jo‘nab ketgan bo‘lsa ham, bu ularning do‘stligiga ta’sir o‘tkazmagan. Do‘stlar muntazam ravishda bir-birlari haqida iliq so‘zlarni aytib keladi.
Shuningdek, Bundesligada o‘ynab yurgan kezlari Emerik Marko Roys bilan ham ancha yaxshi chiqishib qolgan.
“Arsenal”da esa u asosan, Aleksander Lyakazett bilan muloqot qiladi.
Daromadi
Bo‘sh vaqtlarida sayohat qilish va soch parvarishiga alohida e’tibor beradigan Obameyangning “Arsenal”dag haftalik maoshi 250 ming funtga teng. Bu yiliga hisoblanganda, taxminan, 13 million funtni tashkil qiladi. Bundan tashqari unda reklama shartnomalari ham mavjud.
Izoh (0)