Нидерландия Буюк Британияда аввалгисидан тезроқ тарқалаётган янги коронавирус штамми аниқлангани туфайли ушбу мамлакатдан авиарейсларни қабул қилишни тўхтатди, деб ёзади «РБК», Нидерландия ҳукумати сайтига таяниб.

Фото: Reuters

Таъкидланишича, декабрь бошида Нидерландияда худди шу вирус тури аниқланган. Соғлиқни сақлаш миллий институти (RIVM) Бирлашган Қиролликдан рейсларни чеклаш орқали мамлакатга коронавируснинг янги штамми олиб келиниши хавфини минимумга келтиришни тавсия қилди.

«Натижада бугун кечқурун Нидерландия ҳукумати қуйидаги эҳтиёт чораларини қабул қилишга қарор қилди: 20 декабрь куни 6:00 да (Тошкент вақти билан 10:00) Буюк Британиядан рейсларга тақиқ кучга киради. Бу тақиқ энг кечи билан 2021 йил 1 январгача амал қилади», — дейилади ҳукумат хабарида.

Аввалроқ Англия шарқида ва жануби-шарқида, шу жумладан, Лондонда ҳам 20 декабрдан чекловларнинг янги, тўртинчи даражаси амал қилишни бошлаган эди. Янги чекловлар камида икки ҳафта амал қилади. Улар коронавируснинг янги тури тарқалгани туфайли жорий этилмоқда, у эса, Жонсоннинг сўзларига кўра, 70 фоизга юқумлироқ бўлиши мумкин. Ҳозирда Лондонда қайд этилган касалланиш ҳолатларининг 60 фоизи вируснинг янги штамми билан боғланмоқда.

14 декабрь куни мамлакат соғлиқни сақлаш вазири Мэтт Хенкок мутахассислар ушбу тур билан касалланишнинг мингдан ортиқ ҳолатини аниқлаганини, бу Буюк Британиянинг жануби-шарқида касалликнинг тез тарқалиши билан боғлиқ бўлиши мумкинлигини билдирган эди.

Кейинроқ COVID-19 бўйича ЖССТнинг махсус вакили Дэвид Набарро Буюк Британияда аниқланган COVID-19’нинг янги тури тез тарқалиш хусусиятига эга, лекин хавфлилик даражаси юқори эмаслигини маълум қилди.

19 декабрь ҳолатига кўра Буюк Британияда COVID-19’ни юқтириб олиш билан боғлиқ 2 миллиондан ортиқ ҳолат аниқланган. Бир кеча-кундузда бундай ҳолатлар 27 мингтага кўпайган. Пандемия бошидан буён мамлакатда 76 мингдан зиёд одам коронавирусдан вафот этган.

Эслатиб ўтамиз, Жаҳон соғлиқни сақлаш ташкилоти коронавирус инфекцияси пандемияси муносабати билан Европа аҳолисига Рождество ва Янги йилни кутиб олиш учун иложи борича кўчада тўпланишни тавсия қилган эди.

Мавзуга доир: