Таътил пайтида коронавирус инфекциясининг тарқалишига қарши курашиш учун бутун Италия бўйлаб карантин эълон қилинади, деб хабар беради Италия бош вазири Жузеппе Контега таяниб «Интерфакс».
Қайд этилишича, 24 декабрдан 6 январгача бутун Италия «қизил зона»га айланади. Яъни бутун мамлакат бўйлаб эпидемиологик чекловларнинг энг юқори даражаси жорий қилинади. Ушбу давр мобайнида уйни мақсадсиз тарк этиш ҳамда ҳудудлари бўйлаб ҳаракатланиш тақиқланади. Бар ва ресторанлар, шунингдек, озиқ-овқат дўконларидан ташқари барча дўконлар ёпилади.
Конте италияликларга таътилни бирга яшайдиган одамлар билан бирга ўтказишни тавсия қилди. Истиснолар ҳам мавжуд, унга кўра, фуқаролар кунига бир марта соат 05:00 дан 22:00 гача 14 ёшгача бўлган болалар билан биргаликда шу ҳудудда жойлашган уйга ташриф буюриши мумкин.
Бундан ташқари, 28-, 29-, 30 декабрь ва 4 январь кунлари карантин чекловлари бироз юмшатилади. Баъзи дўконлар соат 21:00 га қадар ишлайди, шунингдек, одамлар ўз яшаш ҳудудидан чиқишига рухсат берилади. Уйга қайтишга ҳар қандай кунда рухсат берилади.
Жонс Ҳопкинс университетининг маълумотларига кўра, Италияда жами 1 921 778 нафар одамда коронавирус аниқланган. Беморларнинг 1 226 086 нафари соғайиб кетган, 67 894 нафари эса вафот этган.
Аввалроқ Италияда COVID-19 сабабли юз берган ўлимлар сони Иккинчи жаҳон урушидаги даражага етиши мумкинлиги айтилгани ҳамда Европанинг тўрт мамлакатида Рождество арафасида карантин юмшатилиши ҳақида хабар берилганди.
Изоҳ (0)