Sherzod Shermatov 2030-yilgacha O‘zbekiston ta’lim berish sifati bo‘yicha Top-30 talikka kirishi ko‘zda tutilganini ma’lum qildi

2020-yilning 18-dekabr kuni bo‘lib o‘tgan “Toshkent yoshlar forumi – 2020”da “Ijtimoiy soha – 2030: ta’lim va sog‘liqni saqlash tizimi istiqbollari” mavzusida ochiq muloqot ham tashkil etildi.

“Daryo” muxbirining xabar berishicha, uchrashuvda Xalq ta’limi vaziri Sherzod Shermatov ta’lim berish jarayonidagi islohotlar, rejalar va muvaffaqiyatga erishish bo‘yicha o‘z tavsiyalarini yoshlar bilan o‘rtoqlashdi.

“Ta’limning asosiy vazifasi — yoshlarni kelajakda muvaffaqiyatga tayyorlashdan iborat. Muvaffaqiyat bu — o‘z oldingizga qo‘ygan maqsadingizga qonunni buzmasdan, hech kimning huquqlarini poymol qilmasdan erishishdir. Bu yerda o‘tirganlarning hammasida o‘z muvaffaqiyatiga erishishi uchun imkoniyati yetarli”, – dedi Sherzod Shermatov.

2030-yilgacha O‘zbekiston ta’lim berish sifati bo‘yicha jahonda Top-30 ta mamlakatlari qatoriga kirish vazifasi ko‘zda tutilgan

“Bunga qanday erishish mumkin? Eng avvalo, maktablardagi shart-sharoitlarni yanada yaxshilash lozim. Bir necha yillar oldin maktablardagi sharoitlar juda achinarli ahvolda edi. Hattoki poytaxt maktablari sharoiti maqtagulik emasdi. Bu bo‘yicha qiladigan ishlarimiz hali juda ko‘p. Ikkinchidan, o‘qituvchilarni jamoaviy ishlar va ortiqcha qog‘ozbozliklardan xalos etish zarur. Pedagoglar malakasi sekin-astalik bilan oshib boryapti. Onlayn platformalarda dars o‘tishyapti, yangi bilimlarni egallashmoqda”, – dedi xalq ta’limi vaziri.

Vazirning qo‘shimcha qilishicha, ota-onalarning ta’limga bo‘lgan munosabati ham o‘zgardi. Farzandi kelajagi uchun ta’limda bo‘layotgan islohotlarga qiziqish bildiryapti.

“Lekin, umuman olganda, jamiyatda ta’limga nisbatan munosabat o‘zgarishi kerak. Yoshlarning o‘zi o‘zgarmasa, bilim olishga ishtiyoqi bo‘lmasa, maqsadlarga erishishimiz qiyinlashadi”, — dedi Sherzod Shermatov.