Олий Мажлис Қонунчлик палатаси депутатлари Маъмурий жавобгарлик тўғрисидаги кодекс ва Жиноят кодексига ёлғон маълумот тарқатганлик учун санкцияларни назарда тутувчи қонун лойиҳасини маъқуллади. Бу ҳақда Парламент матбуот хизмати хабар берди.
«Gazeta.uz»нинг ёзишича, Маъмурий жавобгарлик тўғрисидаги кодексга киритилган ўзгартиришларга кўра, шахснинг шаъни ва қадр-қимматини қасддан камситишга олиб келган ёлғон ахборот учун БМҲнинг 50 баробари миқдорида жарима белгиланади, жамоат тартиби ёки хавфсизлигига хавф туғдирадиган ёлғон маълумотларни тарқатганлик учун БҲМнинг 50 баробаридан 100 баробаригача жарима белгиланиши кутилмоқда.
Таклиф этилаётган лойиҳада шахс шундай ҳаракатлари учун муқаддам маъмурий жавобгарликка тортилганидан кейин 1 йил давомида такроран содир этсагина жиноий жавобгарликка тортилиши белгиланмоқда. Унга кўра, шахснинг шаъни ва қадр-қимматини камситадиган ёлғон ахборотни тарқатганлик учун БМҲнинг 150 баробари миқдорида жарима ёки 240 соатгача жамоат ишларига ёки 2 йилгача ахлоқ тузатиш ишларига жалб этиш ёки 2 йилгача озодликдан чеклаш назарда тутилган.
Бундан ташқари, жамоат тартибига хавф туғдирадиган ёлғон маълумотларни тарқатганлик учун БҲМнинг 200 баробаригача жарима белгилаш ёки 300 соатгача жамоат ишларига ёки 2 йилгача ахлоқ тузатиш ишларига жалб этиш ёки 2 йил озодликда чеклаш таклиф этилмоқда.
Бу каби хатти-ҳаракатлар катта миқдорда зарар етказса, жарима миқдори 200 дан 4000 баробаргача белгиланиши ёки 2 йилдан 3 йилгача озодликдан чекланиши мумкин. Оммавий тадбирлар ёки фавқулодда вазиятларда содир бўлса — 3 йилдан 5 йилгача озодликдан чекланиши ёки 3 йилдан 5 йилгача озодликдан маҳрум этилиши мумкин.
Аввалроқ Ўзбекистон Жиноят кодексидан туҳмат ва ҳақорат қилганлик учун озодликдан маҳрум қилиш жазоси олиб ташланиши кутилаётгани тўғрисида хабар берилганди.
Изоҳ (0)