Ўзбекистоннинг расмий захира активлари ўтган ойга нисбатан 463 миллион долларга пасайиб, 1 декабрь ҳолатига кўра 32,9 миллиард долларни ташкил этди. Бу ҳақда Марказий банк маълумотларида келтирилган.
Соф олтин валюта захираси ҳажми 536 миллион долларга пасайиб, 31,9 миллиард долларни ташкил этди.
Ўзбекистоннинг олтин-валюта захиралари ҳажми қаторасига тўртинчи ой қисқармоқда. Мамлакатнинг олтин-валюта захираси май ойидан бери биринчи марта сентябрда қисқарган эди. Сентябрда олтин захираси 18,8 миллиард доллар, хорижий валюта захираси эса 15,4 миллиард долларни, октябрь ойида олтин захираси 18,6 миллиард доллар, хорижий валюта захираси 14,5 миллиард долларни ташкил қилганди. Ноябрь ойида эса олтин захираси 19 миллиард долларни, хорижий валютада захираси 13,9 миллиард долларни ташкил этганди.
Марказий банк апрель ойидан бошлаб чет эл валютасида ҳам, олтин кўринишида ҳам захираларни шакллантираётганди, аммо август ойида (олтин нархи ўзининг тарихий рекордини янгилаган пайтда) олтин сотилиши сабабли захиралар диверсификацияси юз берди.
«Gazeta.uz»нинг The Wall Street Journal’га таяниб ёзишича, олтин нархи COVID-19 вакцинасининг синови натижалари ҳақидаги ижобий янгиликлар фонида ўзгарувчанлигини сақлаб қолмоқда.
Олтин фьючерси 16 декабрь ҳолатига кўра, унсияси учун 1858,50 долларни ташкил этмоқда. Нашрнинг қайд этишича, айрим таҳлилчилар келажакда олтин нархи кўтарилишига ҳали ҳам ишонади.
Изоҳ (0)