Санта-Клаус коронавирус инфекциясига қарши иммунитетга эга бўлгани сабаб бутун дунё болалари учун Рождество совғаларини улашиши мумкин. Бу ҳақда Жаҳон соғлиқни сақлаш ташкилоти эксперти Мария ван Керкховега таяниб, «РБК» хабар берди.
«Мен болажонларнинг Санта-Клаус кексалиги сабаб хавф юқори бўлган гуруҳга киргани учун кела олмаслигидан хавотирга тушаётганини биламан. Аммо сизларга бир нарсани айтишим мумкин, унинг иммунитети бор. Биз яқинда у билан суҳбатлашдик ва у ўзини ажойиб ҳис қилмоқда. Миссис Клауснинг ҳам аҳволи яхши», — дейди Керкхове.
Шунингдек, ЖССТ вакилининг қўшимча қилишича, дунё етакчилари Санта-Клаус ҳаво чегалари бўйлаб ҳаракатланиши ва болажонларга совғаларни етказиши учун коронавирусга қарши чекловларни атайлаб сусайтирган.
Шу билан бирга, эксперт коронавирусга жиддий ёндашиш кераклигини таъкидлаган. У болалардан ижтимоий масофаланишга риоя қилишни ҳамда ота-онасининг сўзларига қулоқ солишни сўраган.
Аввалроқ Британия ҳукумати касалхонага тушиб қолган Санта-Клаус ҳақида видео чиқарган эди. Томошабинлар у болаларни қўрқитишини айтгач, видео ўчириб ташланган.
Изоҳ (0)