Санъаткорларга унвон бериш ва уларни мукофотлаш учун халқнинг баҳоси ҳам алоҳида мезон сифатида портал орқали амалга оширилади. Бу ҳақда 15 декабрь куни Миллий матбуот марказида бўлиб ўтган брифингда маданият вазирининг биринчи ўринбосари Жамол Носиров айтиб ўтди, дея хабар бермоқда «Дарё» мухбири.
Анжуманда маълум қилинишича, концерт-томоша фаолиятининг ягона онлайн портали яратилиш жараёни ниҳоясига етказилмоқда.
«Унга кўра, ҳар бир санъаткорни тўғридан-тўғри кузатиш имконияти, уларнинг рейтинг тизимини баҳолаш, лицензиялаш ишлари ушбу замонавий технологиялар орқали амалга оширилади. Бунинг яна бир муҳим жиҳати шундаки, санъаткорларга унвон бериш ва уларни мукофотлаш учун халқнинг баҳоси ҳам алоҳида мезон сифатида ушбу портал орқали амалга оширилади», – деди Жамол Носиров.
Унинг қўшимча қилишича, эндиликда оммавий маданий тадбирларнинг йиллик календарь режасини ишлаб чиқиш тизими жорий қилинади.
«Йиллик ўтказадиган оммавий тадбирларимизни йил бошидаёқ туманбай, маҳаллабай кесимида режалаштириб оламиз. Бу билан биз икки ютуққа эришамиз. Биринчидан, маданий тадбирлар, концертларни чекка қишлоқларда ҳам ўтказишга эришамиз. Иккинчидан, муаллифлик ҳуқуқини ҳимоя қилиш палатаси ташкил қилинади. Бу муаммо санъаткорларимиз, ижодкорларимиз учун оғриқли нуқта эди», – деди Жамол Носиров.
Изоҳ (0)