Ўзбекистон халқ артисти, кино ва театр актёри Хайрулла Саъдиев Президент фармони билан «Ўзбекистон Республикасида хизмат кўрсатган ёшлар мураббийси» фахрий унвони билан тақдирланди. Бу ҳақда Маданият вазирлиги матбуот хизмати хабар берди.
Маълум қилинишича, 6 декабрь куни Ўзбекистон Маданият вазирлиги томонидан Ўзбекистон давлат санъат ва маданият институтида Ўзбекистон халқ артисти Хайрулла Саъдиевнинг 80 йиллик юбилейи нишонланган.
«Тадбирда халқимизнинг севимли актёри Хайрулла Саъдиев ‘Ўзбекистон Республикасида хизмат кўрсатган ёшлар мураббийси’ фахрий унвони билан тақдирланди», — дейилади хабарда.
Маълумот учун, Хайрулла Саъдиев Республика Ёш томошабинлар театрида ижодий фаолиятини бошлаган. Театр саҳнасида «Ревизор», «Этик кийган мушук», «Шум бола» каби ўнлаб спектаклларда ёдда қоларли ролларни ижро этган. «Тўйлар муборак», «Чинор», «Алпомиш», «Чашма», «Ўтов», «Шайтанат» каби кўплаб бадиий фильмларда яратган образлари минглаб мухлислар олқишига сазовор бўлган.
Эслатиб ўтамиз, Хайрулла Саъдиев шу йилнинг 25 январь куни жамоатчилик асосида Ўзбекистон Киноарбоблари ижодий уюшмаси раисининг маслаҳатчиси этиб тайинланган эди.
Изоҳ (0)