Наманган вилояти ҳудудида 2020 йилнинг 11 ойи давомида жами 622 та йўл-транспорт ҳодисаси содир бўлди. Бу ҳақда «Дарё» мухбири Азизбек Абдувалиев хабар бермоқда.
Ушбу ЙТҲларда 152 киши ҳалок бўлган. Бу кўрсаткич 2019 йилнинг шу даврида 160 кишини ташкил этганди.
Вилоят ИИБ ЙҲХБ матбуот хизматига кўра, вилоятдаги йўл-транспорт ҳодисаларига асосан техник носоз автомобилда узоқ йўлга отланиш, ҳаракат вақтида ухлаб қолиш, тезликни белгиланган меъёрдан ошириш, автомашиналарга керагидан ортиқ юк олиш ҳамда йўлларда, хусусан, Қамчиқ довонида ҳаракатланиш қоидаларини етарли даражада билмаслик сабаб бўлмоқда.
2020 йилнинг шу кунига қадар Қамчиқ довонида 40 та автоҳалокат рўй берган. Уларнинг оқибатида 16 киши ҳаётдан кўз юмган, 36 киши жароҳатланган.
Бундай ҳолатларнинг олдини олиш, зарур бўлган чоғларда зудлик билан ёрдам бериш учун Қамчиқ довонида ФВВ, Соғлиқни сақлаш вазирлиги ва ЙҲХБ томонидан жами 15 та қутқарув пости ташкил этилди, уларнинг 10 таси Наманган вилояти ҳудудида жойлашган.
Шунингдек, вилоят ЙҲХБ ходимлари довонда қишнинг совуқ кунлари йўлга чиққан ҳайдовчиларга бироз тин олиб, қайноқ қаҳва ичишни таклиф қилмоқда.
Эслатиб ўтамиз, олдинроқ Наманган шаҳрининг марказий кўчалари бўйлаб тарғибот мақсадида аварияларда шикастланган автомобиллар айлантирилаётгани ҳақида хабар берилганди.
Изоҳ (0)