Юнусободда ИИБ ходимлари ва фуқаролар ўртасидаги келишмовчилик юзасидан расмий изоҳ берилди

Тошкент шаҳар ИИББ ижтимоий тармоқларда тарқалган Юнусобод туманидаги «Универсам» бозорида ички ишлар ходимлари ва фуқаро ўртасида юзага келган келишмовчилик видеосига изоҳ берди.

Ижтимоий тармоқларда тарқаган видеода ички ишлар органлари ходимларининг жамоат тартибини бузишни бас қилиш ҳақидаги талабларига бўйсунмасдан фаол қаршилик кўрсатган фуқаронинг қўлга олиниши тасвирга тушган. Таъкидланишича, ерда ётган аёл савдо моллари сумкасининг устига ётиб, ходимлар уни ички ишлар бўлимига олиб кетишига қаршилик кўрсатмоқчи бўлган.

Пойтахт ИИББнинг маълум қилинишича, 13 декабрь куни тахминан соат 15:00 ларда Юнусобод тумани ИИО ФМБ 5-сон ички ишлар бўлими профилактика инспекторлари подполковник Ш. Алимқулов ва капитан Д. Мажидов «Универсам» савдо комплекси яқинидаги ерости йўлагида ноқонуний савдо билан шуғулланувчи ҳамда бу билан бошқа фуқаролар учун ноқулайликлар туғдирувчи шахсларга нисбатан чора кўриш ҳақидаги кўплаб мурожаатлардан сўнг воқеа жойига етиб келиб, ерости йўлагида савдо молларини териб қўйган аёл, эркак ва йигитни кўрган.

«Мазкур шахслар ноқонуний савдони тўхтатиб, савдо молларини йиғиштириш ва йўлакни фуқаролар учун бўшатиш тўғрисидаги огоҳлантиришларга рад жавобини берди. Савдо қоидаларини бузганлик учун қонун билан белгиланган жавобгарлик ҳақидаги огоҳлантиришларга аёл ва эркак қўпол тарзда жавоб бериб, бошқа ҳуқуқни муҳофаза қилувчи органларга мурожаат қилишларини айтган.

Бундан ташқари, улар жанжал кўтариб, атрофдагиларнинг эътиборини тортган, уларнинг ўғли бўлган йигит эса хизмат бурчини адо этаётган ички ишлар органлари ходимлари билан муштлашмоқчи бўлган. Воқеа жойига патруль-пост хизмати ходимлари етиб келишганда ҳам йигит ҳуқуқбузарликни бас қилмасдан, патруль-пост хизмати ходимининг юзига урган. Шу сабабли, ходимлар йигитнинг қўлларига кишан солишга мажбур бўлган ва уч нафар тартиббузарнинг шахсини аниқлаш ва кейинги суриштирувлар учун 5-сон ИИБга олиб кетилган», — дейилади хабарда.

Қайд этилишича, ерости йўлагида ноқонуний савдо қилувчи шахслар томонидан келиб чиққан тартиббузарлик ва ноқулайликлардан норози бўлган ўндан ошиқ ҳодиса гувоҳлари кўрсатма бериш мақсадида ички ишлар бўлимига ихтиёрий равишда етиб келган. Ҳуқуқбузарлар – Навоий вилоятидан бўлган 43 ёшли А. ва 42 ёшли Х.Т. ҳамда уларнинг ўғли 19 ёшли А.Х. эканлиги аниқланган.

Ҳодиса юзасидан терговолди текшируви ўтказилаётгани айтилади.

Аввалроқ Чорсуда Миллий гвардия ходимлари бир йигитни куч ишлатиб олиб кетишга урингани, аммо аҳоли қаршилигига дуч келгани тўғрисида хабар берилганди.