Ўзбекистоннинг янги тайинланган фавқулодда ва мухтор элчиси Алишер Қурмонов 11 декабрь, жума куни Мариинский саройида Украина президенти Владимир Зеленскийга ишонч ёрлиғи топширди, деб хабар беради «Дунё» агентлиги.
Эпидемиологик вазиятни ҳисобга олган ҳолда, маросим ишонч ёрлиқларини топшириш ва Украина президентининг нутқи билан чегараланган.
Украина раҳбари ўз сўзида Ўзбекистон Украинанинг Марказий Осиёдаги муҳим шериги экани, томонлар ўзаро савдо-иқтисодий алоқаларни ривожлантириш ва товар айланмасини 1 миллиард долларга етказишга интилаётганини таъкидлаган.
Эслатиб ўтамиз, 2020 йилнинг июнь ойида Алишер Қурмонов Ўзбекистоннинг Украинадаги элчиси этиб тайинланган эди. Алишер Қурмонов бунга қадар Олий Мажлис Сенатининг Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси лавозимида ишлаган. Шунингдек, у Ўзбекистоннинг Буюк Британия ва Шимолий Ирландия Бирлашган Қироллигидаги фавқулодда ва мухтор элчиси лавозимида фаолият юритган.
Изоҳ (0)