«Синовда оила аъзоларим ҳам қатнашяпти». Ўзбекистон инновацион ривожланиш вазири Хитой вакцинаси масаласида аҳолини хотиржамликка чақирди
Инновацион ривожланиш вазири Иброҳим Абдураҳмонов бир неча кўнгиллилар, шу жумладан, ўз оила аъзолари ҳам икки ҳафта олдин Хитой рекомбинант вакцинасини олгани, 14 кундан бери бирорта ножўя таъсири кузатилмаганини маълум қилди, деб хабар беради «Kun.uz».
Аввалроқ коронавирусга қарши Хитой Фанлар академиясининг Микробиология институти олимлари томонидан ишлаб чиқилган вакцинанинг 3-босқич синовлари Ўзбекистонда ҳам старт олган эди. Жами 5 минг нафар кўнгилли танлаб олинган.
«Энг муҳим жиҳатлардан бири — вакцинациянинг синов жараёнларини тўлиқ хитойлик ҳамкорларимиз билан биргаликда ўтказамиз. Очиғини тан олиб айтамиз, бу жараёнларни ҳам дунё стандартлари даражасида ўтказишни ўрганишимиз керак. Кўнгиллиларни жалб қилишда тартибга риоя қилиш лозим. Сабаби — бу илмий тадқиқот. Буни тўғри тушунишимиз керак. Масалан, синовларда қатнашган одамлар текширувга келмай қолиб, самарадорликни ўлчаш ишлари чўзилиб кетиши каби ҳолатлар бўлмаслиги керак. Бир ой давомида хитойлик ҳамкорлар билан биргаликда вакцинация жараёнини амалга оширамиз. Бу бўйича шифокорларимизга тренинглар ўтказдик», — дейди Абдураҳмонов.
Инновацион ривожланиш вазирининг таъкидлашича, ушбу вакцинанинг хавфсизлигига ишонч ҳосил қилгачгина, биринчи ва иккинчи синовларидан яхши ўтганидан кейин қўшимча эффектлари бўлдими-йўқми, ҳаммасини ўргангандан кейин Ўзбекистонга олиб келиш чораларига ва синовларига розилик билдирилган.
«Ва буни сизларга ишонч билан айтишим мумкинки, биринчидан, ўзимнинг оиламда, кўнгиллиларда 14 кун олдин бу вакцинанинг синовини ўтказдик. 14 кундан бери бирорта ножўя таъсирлар кузатилгани йўқ. Шунинг учун ҳам мана бугун синовларга старт берилганида бизда ҳадик йўқ. Халқимиздан синовини ўтказиб, бир тажрибага айлантириляпти, деган фикрлардан йироқ бўлишларини сўрардим», — дея қайд этади Иброҳим Абдураҳмонов.
«Вакцинани кўнгиллиларда, ўзлари мурожаат қилган ташкилотларнинг ходимларида амалга оширамиз. Эмлангандан сўнг 35 минут давомида кузатув олиб борилиши керак. Кейин эса 24 соат давомида мулоқотда бўлиб туриш лозим. Жараён 1 йил давом этади. Шу вақт мобайнида эмланганлар 8 марта тиббий кўрикка чақирилиши кўзда тутилган», — дейди инновацион ривожланиш вазири.
Мавзуга доир:
Фармацевтика тармоғини ривожлантириш агентлиги берган маълумотга кўра, вакцина устида сифат назорати текширувларини ўтказиш учун Инновацион ривожланиш вазирлигининг Илғор технологиялар маркази агентликка 21 октябрь куни эмас, балки 19 ноябрь куни тақдим этган. Хитой вакцинасининг плацебо намуналари ва тегишли стандартлар ҳамда реагентлар Фармацевтика тармоғини ривожлантириш агентлиги ҳузуридаги Давлат маркази томонидан қабул қилинган.
