Toshkentda 18—21-dekabr kunlari Tashkent City Kongresslar zali va Humo Arena majmuasida ilk marotaba hukumat a’zolari bilan yoshlarning uchrashuvi — “Toshkent yoshlar forumi — 2020” bo‘lib o‘tadi, deb “Daryo”ga xabar berdi forum tashkilotchilari .
Forumda poytaxtda fan, ta’lim, madaniyat va san’at yo‘nalishlarida tahsil olayotgan talabalar, ijtimoiy faol yoshlar, hukumat a’zolari, vazirlik va idoralar rahbarlari, san’at va madaniyat namoyandalari, taniqli ilm-fan arboblari, xorijiy ekspertlar ham ishtirok etishi kutilmoqda.
Toshkent shahar hokimligi tomonidan Yoshlar ishlari agentligi hamda O‘zbekiston yoshlar ittifoqi hamkorligida tashkil etilayotgan Yoshlar forumi doirasida ta’lim, sog‘liqni saqlash, madaniyat, sport, turizm, iqtisodiyot, bank, sud-huquq kabi ko‘plab sohalarda yosh iqtidorli kadrlarni izlab topish, ularni qo‘llab-quvvatlash va keng jamoatchilikka tanitish, yosh ijodkorlarning professional malakasini oshirish, soha va tarmoq rahbarlariga o‘z taklif va tashabbusini namoyish etishiga yo‘l ochib berish maqsad qilingan. Unda 5 ming nafarga yaqin yoshlar o‘z sohalarida taklif va taqdimotlar bilan qatnashadi.
Forum dasturining birinchi kuni ma’ruzalar va ishtirokchilarning ta’lim vaziri Sherzod Shermatov, bosh vazir o‘rinbosari, turizmni rivojlantirish davlat qo‘mitasi raisi Aziz Abduhakimov, adliya vaziri Ruslanbek Davletov, bosh vazirning maslahatchisi Olimjon Umarov va boshqalar bilan ochiq uchrashuvlarini o‘z ichiga oladi. Kun yosh rejissorlarning “Debyut” qisqa metrajli filmlari namoyishi bilan yakunlanadi.
Forumning ikkinchi kuni — 19-dekabr kuni ishtirokchilarning taniqli blogerlar bilan uchrashuvi va 2021-yilga rejalashtirilgan Toshkent tumanlarida loyihalar taqdimotini o‘tkazish rejalashtirilgan. Shunqorlar harbiy sport tadbirlari, “Viktorina” va “Munozara” intellektual o‘yinlari, “1+1” biznes loyihasi, Yangi Toshkent qiyofasi tanlovi, Yoshlar va Media mukofoti hamda Talabalar festivali shular jumlasidandir.
Qayd etilishicha, 4 kun davom etadigan forum dasturidan Ko‘cha sporti (Street workout) musobaqasining respublika bosqichi, O‘zbekistonda yoshlar turizmini rivojlantirish, Toshkentning turistik salohiyatini targ‘ib qilishga qaratilgan “Yangi Toshkent” foto va videoroliklar tanlovi sovrindorlarining ko‘rgazmasi ham joy olgan. Tadbir yakunida teleko‘prik orqali poytaxtlik yoshlarning respublika yoshlariga murojaati o‘qib eshittiriladi.
Shuningdek, unda Toshkent shahar hokimi Jahongir Ortiqxo‘jayev ham chiqish qilishi kutilmoqda.
Shu bilan birga, 21-dekabr kuni esa forum doirasidagi tadbirlarda faol ishtirok etgan yoshlar taqdirlanib, Humo Arena muz saroyida bo‘lib o‘tadigan gala-konsert bo‘lib o‘tadi.
“Toshkent yoshlar forumi – 2020”da qatnashmoqchi bo‘lgan yoshlar tashkent2020.uz saytida ro‘yxatdan o‘tishlari kerak bo‘ladi.
Avval Toshkentda bir oy davomida “Toshkent yoshlarni sevadi” shiori bilan yoshlar festivali bo‘lib o‘tishi haqida xabar berilgandi.
Izoh (0)