Ўзбекистон прокуратура ходимлари ижтимоий аҳамиятга эга бўлган озиқ-овқат маҳсулотлари нархларини манипуляция қилиш, уларга бўлган сунъий танқисликни вужудга келтиришга қарши курашиш орқали нархларнинг барқарорлигини таъминлаш мақсадида мамлакатда фаолият юритаётган деҳқон бозорларига бириктирилди. Бу ҳақда Бош прокуратура хабар қилди.
Маълум қилинишича, мамлакат деҳқон бозорларига прокуратура ходимлари бириктирилиб, улар доимий асосда нархларнинг барқарорлигини таъминлаш, ишлаб чиқарувчиларни деҳқон бозорларига тўсқинликсиз кириб келиши ҳамда бу борадаги коррупцияга қарши курашиш тадбирларини амалга оширмоқда.
Нархларнинг доимий ўрганилиши натижалари бўйича нарх ошиши эҳтимоли юқори бўлган ҳудудларга 220 минг тонна маҳсулотлар келтирилиб, нархлар мўътадиллаштириб борилган.
Шунингдек, деҳқон бозорларида 1830 та раста ва савдо нуқтадан иборат озиқ-овқат маҳсулотларининг арзонлаштирилган ярмаркалари ташкил этилиб, уларда маҳсулотлар бошқа расталарга нисбатан арзон сотилмоқда.
Прокуратура ахборот хизматининг маълум қилишича, кўрилаётган бу каби чоралар нархларнинг асоссиз ошиб кетишининг олдини олишга хизмат қилмоқда.
Таъкидланишича, қиш—баҳор мавсумида захира тадбирларини ташкил этишнинг моддий асослари яратилиб, тасдиқланган графикка мувофиқ, маҳаллий ҳокимликлар томонидан бугунги кун ҳолати бўйича 791,4 минг тонна ёки режага нисбатан 99,6 фоиз асосий турдаги озиқ-овқат маҳсулотларининг захираси жамғарилган.
Аҳолига қулайлик яратиш мақсадида кичик экобозорларни ташкил этиш бўйича зарур ер майдони ажратилиб, тармоқ жадвалларига мувофиқ 10 декабрь ҳолатига кўра уларнинг 363 таси фойдаланишга топширилди.Нархларни асоссиз ошириш ҳолатларига нисбатан ўтказилган тадбирлар натижасида маҳсулотни қиммат сотилишининг олди олиниб, жиддий қонунбузилиш ҳолатлари бўйича жиноят ишлари қўзғатилмоқда.
Қайд этилишича, ҳозирда маҳаллий ҳокимликлар билан биргаликда Янги йил байрами арафасида арзонлаштирилган маҳсулотлар ярмаркаси ўтказиладиган жойлар белгиланиб, деҳқон-фермерларни бириктириш ишлари амалга оширилмоқда.
Озиқ-овқат маҳсулотлари нархларининг барқарорлигини таъминлаш бўйича ишлар прокуратура органлари томонидан алоҳида назоратга олинган.
«Янги йил байрами арафасида ижтимоий аҳамиятга эга бўлган озиқ-овқат маҳсулотлари тақчиллигининг вужудга келмаслиги ҳамда нархларнинг мўътадил сақланишини таъминлашга прокуратура органлари кафолат беради.
Фуқаролар асосий турдаги озиқ-овқат маҳсулотлари нархларининг асоссиз равишда оширилиш ҳолатларига, шунингдек, ишлаб чиқарувчилар, фермерлар, деҳқон хўжаликлари ҳамда томорқа ер эгалари деҳқон бозорларида ўз маҳсулотларини сотишда турли тўсиқларга дуч келган тақдирда Бош прокуратура ҳузуридаги Департаментнинг 71 233 10 07 рақамли ишонч телефонига мурожаат қилишлари мумкинлигини эслатиб ўтамиз», — дейилади прокуратура хабарида.
Аввалроқ Самарқанддаги «лой бозор»нинг камчиликлари интернетда тарқалган фото ва видеолар сабаб бир кунда бартараф этилгани ҳамда Чорсуда Миллий гвардия ходимлари бир йигитни куч ишлатиб олиб кетишга урингани, аммо аҳоли қаршилигига дуч келгани ҳақида хабар берилганди.
Изоҳ (0)