Ҳокимият тепасида республикачилар бўлган 17 та штат вакиллари АҚШ Олий судига мурожаатнома юбориб, Техас бош прокурори Кен Пекстоннинг президент сайлови натижаларини қайта кўриб чиқишни сўраб берган даъвосини қўллаб-қувватлади. Бу ҳақда CNBC’га таяниб, «РБК» хабар бермоқда.

Фото: AP Photo

Гап Миссури, Алабама, Арканзас, Флорида, Индиана, Канзас, Луизиана, Миссисипи, Монтана, Небраска, Шимолий Дакота, Оклахома, Жанубий Каролина, Жанубий Дакота, Теннесси, Юта ва Ғарбий Виржиния ҳақида бормоқда.

Телеканалнинг қайд этишича, бу мурожаат Пекстон Жоржия, Мичиган, Пенсильвания ва Висконсин штатларида (уларнинг барчасида демократ Жо Байден ғолиб бўлган) сайлов натижаларини ҳақиқий эмас деб топишни сўраб Олий судга мурожаат қилганидан кейин эртаси куни берилган. Техас бош прокурори фикрича, ушбу штатларда, шу жумладан, почта орқали юборилган бюллетенларни кўриб чиқишга алоқадор меъёрларга риоя қилинмаган.

17 та штатдан иборат гуруҳ «суд дўстлари» мурожаатини берган. Америка ҳуқуқ тизимида суд можаросининг тўғридан-тўғри иштирокчиси бўлмаган манфаатдор шахслар шундай аталади. Улар ўз фикрини билдириш мақсадида судга ёзма мурожаат қилиш ҳуқуқига эга.

Fox News хабар беришича, даъводан мақсад — Жоржия, Пенсильвания, Мичиган ва Висконсиндан сайлов ҳайъати аъзоларининг белгиланишини кейинроққа суриш. Даъвода таъкидланишича, бу штатлар президент сайловларини ўтказиш қоидаларини ўзгартириб, конституцияни бузган. Шунингдек, унда ушбу штатлар томонидан қабул қилинган янги қоидалар де-факто овоз бериш жараёнида катта кўламли қонун бузилишлари юзага келишига имконият яратган.

АҚШ президенти Дональд Трамп Техас томонидан берилган даъвога уни манфаатдор томон сифатида қўшиб қўйишни талаб қилди. Жавобгар штатларнинг ҳар бирида расмий шахслар 2020 йилги сайловларни ўтказишда штат қонунларини ўзгартирган ёки унга риоя қилмаган», — дейилади Трамп адвокатларининг аризасида.

Давлат раҳбари сайлов натижаларини қайта кўриб чиқиш ҳақидаги даъвога қўшилган штатларга миннатдорлик билдирди. «Қойил! Сайловларда АҚШ тарихида энг мисли кўрилмаган фирибгарлик ҳақидаги ишда Техасга камида 17 та штат қўшилди. Раҳмат!» — деб ёзади у Twitter.

Дональд Трамп 3 ноябрда бўлиб ўтган сайловларда мағлуб бўлганини тан олмай, сайлов натижалари қалбакилаштирилганини даъво қилмоқда. У баъзи муҳим штатларда овоз бериш якунлари қайта кўриб чиқилишини талаб қилиб, бунинг учун 9 миллион доллар ҳам сарфлади. Аммо бюллетенларнинг қайта санаб чиқилиши Байденнинг ғалабасини кўрсатди. Судлар ҳам амалдаги президент жамоасининг овоз бериш ва бюллетенларни ҳисоблаш жараёнидаги қонун бузилишлари ҳақидаги даъволарини рад этди.

Декабрь бошида Трамп сайловлар ҳалол бўлган тақдирдагина мағлубиятини тан олишини билдирганди. «Мен сайловда мағлуб бўлишга қарши эмас, лекин у адолатли бўлишини хоҳлайман. Истамайдиган нарсам шуки, сайловлар Америка халқидан ўғирлаб олинмасин», — деди Трамп.

Кейинроқ АҚШнинг амалдаги президенти Дональд Трамп 2024 йилда давлат раҳбари лавозимига ўз номзодини қўйиши мумкинлигини билдирди.