АҚШда бир кеча-кундузда COVID-19’дан вафот этганлар сони бутун пандемия давридаги энг юқори кўрсаткичга етди, деб ёзади «РБК».
The New York Times маълумотларига кўра, сўнгги 24 соат ичида мамлакатда 3011 киши коронавирус оқибатида вафот этган. Бундан аввалги рекорд 3 декабрда қайд этилган, ўшанда ўлимлар сони 2879 тани ташкил қилган эди. Бунга қадар ўлим даражаси бўйича рекорд ярим йилдан ортиқ вақт давомида сақланиб турган ва пандемиянинг биринчи тўлқини чоғидаёқ ўрнатилган эди (15 апрелда 2752 та ўлим ҳолати).
Нашрнинг ёзишича, АҚШ коронавирус қурбонларининг умумий сони бўйича ҳам яна бир катта рақамга яқин қолган (уларнинг сони тез орада 300 минг кишига етиши мумкин). Нашр ҳисоб-китобларига кўра, ҳозирда мамлакатда COVID-19 оқибатида камида 288 минг киши ҳаётдан кўз юмган.
Covid Tracking Project портали маълумотларига қараганда, айни вақтда Америка касалхоналарида 106 мингдан зиёд коронавирус беморлари ётибди. Мамлакат бўйича ҳар куни ўртача 200 мингдан ортиқ одам касалликка чалинмоқда.
Американинг Жонс Ҳопкинс университети маълумотларига кўра, АҚШ COVID-19 билан касалланганлар ва унинг оқибатида вафот этганлар сони бўйича дунёда биринчи ўринни эгалламоқда. Бутун пандемия даврида мамлакатда 15,3 миллион киши касалликни юқтирган, қарийб 290 минг киши вафот этган. Бутун дунёда эса 68,8 миллион кишида вирус аниқланган, шуларнинг 1,56 миллиони вафот этган.
Изоҳ (0)