Олий даражада эришилган келишувларга мувофиқ, 2020 йилнинг 11 декабрь куни Ўзбекистон Президенти Шавкат Мирзиёев ва Ҳиндистон бош вазири Нарендра Модининг видеоанжуман шаклидаги учрашуви бўлиб ўтади, дея хабар бермоқда Президент матбуот хизмати.
Тадбир кун тартибидан Ўзбекистон–Ҳиндистон дўстлик ва стратегик шериклик муносабатларини янада мустаҳкамлаш, сиёсий, савдо-иқтисодий, инвестициявий, маданий-гуманитар ва бошқа соҳалардаги кўп қиррали ҳамкорликни кенгайтиришнинг долзарб масалалари ўрин олган.
Таъкидланишича, коронавирус инфекциясининг глобал миқёсда тарқалиши оқибатларини енгиб ўтишда яқиндан ҳамкорликни давом эттириш масалаларига алоҳида эътибор қаратилади.
Шунингдек, ўзаро савдо ҳажмини ошириш, транспорт алоқаларини ривожлантириш, қишлоқ хўжалиги, энергетика, ахборот-коммуникация технологиялари, соғлиқни сақлаш, фармацевтика ва бошқа тармоқларда кооперацияни кучайтириш ҳамда ҳудудлараро мулоқотлар, таълим ва гуманитар алмашинувни фаоллаштиришга қаратилган дастур ва лойиҳаларни кўриб чиқиш режалаштирилган.
Учрашув чоғида икки давлат етакчилари жаҳон ва Марказий Осиёдаги вазият юзасидан фикр алмашади, замонавий таҳдид ва хатарларга қарши самарали курашиш чора-тадбирларини муҳокама қилади.
Олий даражадаги музокаралар якунида қўшма баёнот қабул қилиниб, иқтисодиёт ва инновациялар, молиявий-техник кўмак, божхона иши ва савдони техник тартибга солиш, кадрлар тайёрлаш ва қўшма илмий тадқиқотлар ўтказишга доир қатор ҳукуматлараро ва идоралараро битимлар имзоланади.
Аввалроқ Афғонистон президенти Ашраф Ғани Шавкат Мирзиёевга афғонлараро тинчлик жараёнини қўллаб-қувватлаётгани учун миннатдорлик билдиргани ҳақида хабар қилинганди.
Изоҳ (0)