«Давлат амалдорларининг хорижда активлар сотиб олишини тартибга солиш вақти келди», — деб баёнот берди Коррупцияга қарши курашиш агентлиги директори Акмал Бурҳонов. Бу ҳақда «Kun.uz» хабар қилди.
«Ноқонуний бойлик орттириш ёки мансабдор шахсларнинг чет элларда мол-мулкларни харид қилиши масалалари тартибга солинмаган. Бугунги кунда давлат хизматчиси бўлган хоҳлаган мансабдор шахс чет элда банк ҳисобрақамини очиши ва исталган мол-мулкни сотиб олиши мумкин. Буларни ҳам тартибга солиш вақти келди, деб ўйлаймиз», — деди Бурҳонов 9 декабрь куни журналистларга берган интервьюсида.
Бундан ташқари агентлик директори коррупцион жиноятларга қўл уриб, жавобгарликка тортилган шахсларни ҳар бир соҳа кесимида очиқлаш режалаштирилганини маълум қилди.
Аввалроқ Ўзбекистонда мансабдор шахс томонидан ноқонуний бойлик орттирганлик учун жиноий жавобгарлик белгилаш таклиф этилгани ҳамда туман ҳокимларига нархи 267,5 миллион сўмдан юқори хизмат автомобили сотиб олиш тақиқланиши мумкинлиги хабар қилинганди.
Изоҳ (0)