Ўзбекистон Миллий олимпия қўмитаси (МОҚ) ижроия қўмитасининг навбатдан ташқари йиғилиши 9 декабрь, душанба куни бўлиб ўтди, деб хабар бермоқда Жисмоний тарбия ва спорт вазирлиги ахборот хизмати.
Унда 16 декабрь куни Уммоннинг Маскат шаҳрида бўлиб ўтадиган Осиё Олимпия кенгашининг (ООК) навбатдаги бош ассамблеясига тайёргарлик кўриш, ушбу тадбирда бўлиб ўтадиган ООК раҳбарияти таркибига, хусусан, ташкилот вице-президентлигига Ўзбекистон томонидан таклиф этиладиган номзодни кўриб чиқиш масаласи кўриб чиқилди.
Маскатда бўлиб ўтадиган бош ассамблеяда 2030 йил бўлиб ўтадиган ёзги Осиё ўйинларига мезбон давлат аниқланади. Шунингдек, халқаро ташкилотга вице-президентлар сайланиб, 2025 йил бўлиб ўтадиган IV ёшлар Осиё ўйинларининг мезбон мамлакати, яъни Ўзбекистон томони билан шартнома имзоланади.
Ижроқўм йиғилишида Отабек Умаров номзоди ООК вице-президентлигига илгари сурилди.
Осиё Олимпия кенгашида жами 10 нафар вице-президент фаолият кўрсатади. Уларнинг 5 нафари қитъадаги минтақалар бўйича иш олиб борса, қолган ярми Осиё қитъасида ўтадиган бешта йирик комплекс мусобақалар, яъни ёзги Осиё ўйинлари, қишки Осиё ўйинлари, Жанг санъати ва ёпиқ иншоотлардаги Осиё ўйинлари, соҳил Осиё ўйинлари ҳамда ёшлар Осиё ўйинларини юқори савияда ташкил этишга масъул ҳисобланади. 16 декабрь куни Маскатда бўлиб ўтадиган ассамблеяда 2021 йилдан бошлаб ўтказиладиган комплекс мусобақаларга мезбонлик қилувчи мамлакатлар ООК вице-президентлиги учун ўз номзодини илгари суриш имкониятига эга. Шу тариқа Ўзбекистон илк бор 2025 йил ёшлар Осиё ўйинларини қабул қилиши эвазига ушбу нуфузли ташкилот раҳбариятига ўз вакилини номзод қилиб кўрсатиш ҳуқуқини қўлга киритди.
Шунингдек, Ижроқўм йиғилишида Тошкент—2025 ёшлар Осиё ўйинлари дирекциясининг директори ҳам сайланди. Ушбу лавозимга МОҚ бош котиби Ойбек Қосимов номзоди бир овоздан маъқулланди.
Эслатиб ўтамиз, МОҚ собиқ президенти Умид Аҳмаджонов 2019 йилнинг март ойида 2019—2022 йиллардаги мусобақалар учун ООК вице-президенти этиб сайланганди.
Маълумот учун, Отабек Умаров Ўзбекистон Президенти Шавкат Мирзиёевнинг кенжа куёви ҳисобланади. У 2019 йилнинг 7 мартида Ўзбекистон Триатлон федерациясига раис бўлганди. 2019 йил 8 ноябрида эса янги ташкил этилган Ўзбекистон MMA ассоциацияси президентига айланганди. Шунингдек, 2020 йил 9 февралида унинг янги тузилган Ўрта Осиё MMA конфедерацияси раҳбарига айлангани ҳақида хабар берилганди. Умаров 2020 йилнинг август ойида Триатлон федерацияси раислиги ва MMA ассоциацияси президентлигидан кетганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)