«Бизни халқаро ташкилотлар кўп танқид қилмоқда». Танзила Норбоева чақалоқ савдоси айбдорларига енгил жазо қўлланилаётгани ҳақида

Ўзбекистонда охирги икки йил ичида чақалоқ савдоси бўйича 49 нафар ота-она ва 38 нафар воситачи айбланиб, жиноий жавобгарликка тортилган. Аммо айбдорларга нисбатан жазо чораларини қўллашда енгилликлар бериб юборилмоқда. Мисол учун, 2019—2020 йилларда фарзандини сотган ота-оналарнинг 38,8 фоизига, воситачиларнинг эса бор-йўғи 5,2 фоизига қамоқ чораси қўлланилган, холос. Қолганларига эса синов муддати, ахлоқ тузатиш ишларига жалб этиш каби чоралар қўлланилган. Бу ҳақда 4 декабрь куни Одам савдоси ва мажбурий меҳнатга қарши курашиш Миллий комиссиясининг навбатдаги йиғилишида сўз юритилди, дея хабар бермоқда «Дарё» мухбири.

Олий Мажлис Сенати раиси Танзила Норбоева чақалоқ савдоси иштирокчиларига нисбатан жиноий жазони кучайтириш лозимлигини таъкидлаб, ИИВ ва Олий суд вакилларига топшириқ берди.

Чақалоқ савдоси билан боғлиқ жиноят айбдорларининг кўпчилигига қамоқ жазоси ўрнига енгил жазолар қўлланиляпти. Бизни халқаро ташкилотлар мана шу борада жуда кўп танқид қилмоқда. Улар «Қонунларда белгиланган бўлса ҳам сизлар жиноий жавобгарликка тортмайсизлар», дейишяпти. Жазони енгил берилиши халқаро рейтингларда ҳам ўрнимизни тушириб юбормоқда. Мен рейтинг учун ишланглар, демаяпман. Лекин жиноятчи қилмишига яраша жазосини олиши керак-да. Бола сотяпти-ю, лекин енгилгина жазо олса ёки огоҳлантириш орқали маълум миқдорда жарима тўлаб қўя қолса, бу нима дегани? Эртага бу ишни яна қилаверади.

Автомобиль ўғирлашга нисбатан жиноий жавобгарликни кучайтирганимиздан кейин машина ўғрилари кескин камайиб кетди, тўғрими? Чақалоқ савдоси қатнашчиларига ҳам жазони кучайтириш керак, назаримда. Қонунларни қатъийлаштиришга Қонунчилик палатаси ҳам, биз ҳам тайёрмиз. Бу масалани жиддий ва тезкорлик билан кўриб чиқмасак, бу жиноят давом этаверади. Олий суд ва Ички ишлар вазирлиги вакиллари биргаликда ишлаб, шу бўйича таклиф киритасизлар.

Танзила Норбоева, Олий Мажлис Сенати раиси