Самарқанд давлат тиббиёт институтининг 300 нафарга яқин талаба ва магистри Қашқадарё вилояти соғлиқни сақлаш тизимига амалий ёрдам кўрсатиш учун сафарбар этилади. Бу ҳақда «Дарё»га институт ахборот хизмати маълум қилди.
Таъкидланишича, Президентнинг 2020 йил 10 ноябрдаги «Аҳолининг соғлом овқатланишини таъминлаш бўйича қўшимча чора-тадбирлар тўғрисида»ги қарори асосида Соғлиқни сақлаш вазирлигининг 2020 йил 20 ноябрда расмийлаштирилган «Бакалавриат, магистратура ва клиник ординатура (резидентура) битирувчиларини тиббиёт муассасаларига ишлашга юбориш ҳақида»ги буйруғига кўра қашқадарёлик ва сурхондарёлик магистратура, клиник ординатура (резидентура) йўналишларининг 5- ва 6-босқич талабалари соғлиқни сақлаш тизимида шифокорлар етишмаётган вилоятга юборилади.
Сафарбарликка жалб этилаётган 300 нафарга яқин талаба ва магистр ярим кун аҳолига тиббий ёрдам кўрсатади ҳамда куннинг иккинчи ярмида онлайн тарзда ўқишини давом эттиради. Улар ушбу тадбир жараёнида ўз иш ўринларини ҳам топиши кўзда тутилмоқда.
Изоҳ (0)