Молдова бош вазири Ион Кику коронавирусга чалинди. Бу ҳақда ҳукумат матбуот хизматига таяниб «РБК» хабар қилди.
«COVID-19 вирусига хос аломатлар пайдо бўлиши сабабли бош вазир Ион Кику тест топширди. Тест жавоби — мусбат», — дейилади хабарда.
Ҳукумат Кику масофадан туриб ишлашини қўшимча қилган.
Молдова Соғлиқни сақлаш, меҳнат ва аҳолини ижтимоий муҳофаза қилиш вазирлигининг маълумотларига кўра, 8 декабрда 1709 кишида коронавирус аниқланган. Молдовада эпидемия бошланганидан бери 119 204 та COVID-19 билан боғлиқ ҳолат аниқланган.
Ноябрь ойи охирида Молдовада коронавирус тарқалиши сабабли бутун мамлакат бўйлаб фавқулодда ҳолат жорий этилди. Ушбу чора 2021 йил 15 январгача амал қилади.
Ушбу даврда мамлакатда барча кўнгилочар тадбирлар тақиқланди, тунги клублар ва караоке фаолияти тўхтатилди. Ресторан, бар ва кафеларга фақат соат 07:00 дан 22:00 гача ишлашга рухсат берилади.
Аввалроқ кичик Дональд Трамп, Украина соғлиқни сақлаш вазири, Украина президенти Владимир Зеленский ҳамда FIFA президенти Жанни Инфантино коронавирусга чалингани ҳақида хабар берилганди.
Изоҳ (0)