Швеция прокуратураси ўз ўғлини 28 йил уйдан чиқармаган аёлга нисбатан қўйилган айбловларни олиб ташлади. Тергов жараёнида эркак ноқонуний озодликдан маҳрум қилиш қурбони бўлгани ва квартирасида ўз ихтиёрига қарши сақлангани ҳақида далиллар топилмаган. Бу ҳақда «Интерфакс» хабар берди.
Аввалроқ Стокгольм яқинидаги квартирада 28 йил давомида онаси томонидан уйда сақланган эркак топилгани ҳақида хабар берилганди. Мазкур давр мобайнида эркак тишларидан ажралгани, оёқлари яра билан қоплангани ва операцияга муҳтож бўлгани маълум қилинганди. Қайд этилишича, 41 ёшли эркак квартирадаги чиқинди уюмлари орасидан топилган.
Эркакнинг онаси ўғлини ноқонуний равишда озодликдан маҳрум қилгани ва унга зарар етказгани ҳақидаги айбловларни рад этган. Аёл ҳибсдан озод этилган.
Терговчилар квартирада ҳеч қандай қулфланадиган хонани топмаган, шунингдек, эркак қаердадир қамалгани ёки чиқишга қўйилмаганига ҳеч қандай далил аниқланмаган. Бундан ташқари, эркакнинг ўзи кўчага чиқиш ҳақида қарор қила олганини айтган. Эркакни квартирадан ташқарида кўрган гувоҳлар ҳам мавжуд.
Прокуратура томонидан маълум қилинишича, эркак олган жароҳатлар зўравонлик билан боғлиқ эмас.
Аввалроқ эркакни унинг опаси топиб олгани ҳақида хабар берилганди. Қизи онаси касалхонада эканлигини билиб, унинг квартирасига келган. Унинг ўзи онасининг уйидан ўсмирлик вақтида чиқиб кетган ва ўшандан буён укасини кўрмаганди. Аёлнинг айтишича, укаси 11 ёки 12 ёшида мактабга бормай қўйган вақтда, у бу ҳолатга ижтимоий хизматлар эътиборини тортишга уринган.
Опанинг сўзларига кўра, уларнинг онаси кўп йиллар аввал ўғлидан айрилган. Унинг яна бир ўғли туғилгач, унга вафот этган ўғлининг исмини қўйган ва вафот этган ўғлини қайтариш орзусида кичкина ўғлига ҳаддан ташқари ғамхўрлик қилган.
Изоҳ (0)