ИҲТТ: Жаҳон иқтисодиёти 2021 йилда пандемиядан олдинги даражага етади

Яқин икки йил давомида жаҳон иқтисодиёти ривожлана бошлайди ва 2021 йил охирига келиб, пандемиядан олдинги даражага етади. Бу ҳақда Иқтисодий ҳамкорлик ва тараққиёт ташкилоти (ИҲТТ)нинг Economic Outlook ярим йиллик прогнозида маълум қилинди, деб ёзади «Gazeta.uz».

2020 йилда кескин пасайиб кетганидан кейин, дунё бўйича ялпи ички маҳсулот 2021 йилда тахминан 4,25 фоизга, 2022 йилда 3,75 фоизга ўсади, деб прогноз қилмоқда экспертлар.

«Илмий прогресс, фармацевтик муваффақиятлар, самаралироқ кузатув ва изоляция, шунингдек, одамлар ва компаниялар фаолиятини тузатиш вирусни назорат остида тутишда ёрдам бериб, аста-секинлик билан чекловларни бекор қилиш имконини беради. Пандемия бошида буён амал қилаётган, иш жойларини ва фирмаларни қўллаб-қувватлаш сиёсати чекловлар бекор қилинганидан кейин қайта тикланишни тезлаштириш имкониятини беради», — дейилади прогнозда.

Шу билан бирга, ташкилотдагилар кутишича, қайта тикланиш мамлакатлар бўйича бир текисда бўлмайди, бу эса жаҳон иқтисодиётида узоқ муддатли ўзгаришларга олиб келиши мумкин. Бошқалардан эртароқ қайта тикланишни бошлаган Хитой иқтисодиёти қатъий равишда ўсиб боради, 2021 йилда жаҳон иқтисодиёти ўсишининг учдан бир қисмидан кўпроғи унинг ҳиссасига тўғри келади. ИҲТТ мамлакатлари иқтисодиёти келаси йил 3,3 фоизга ўсиб, қайта тикланади, аммо 2020 йилдаги чуқур рецессиядан фақат қисман қайта тикланади.

Давлатлар пандемиядан энг кўп зарар кўрганларга эътибор қаратган ҳолда, ўз сиёсий воситаларидан фаол тарзда фойдаланишда давом этиши керак, дейилади маърузада. ИҲТТ мутахассислари ҳукуматлар учун учта бирламчи йўналишларни маслаҳат беради, булар — энг зарур маҳсулотлар ва хизматларга инвестициялар (таълим, соғлиқни сақлаш, жисмоний ва рақамли инфратузилма), қашшоқликка ва тенгсиз даромадларга қарши кураш, шунингдек, халқаро ҳамкорликни қўллаб-қувватлаш.