Ўзбекистонда каннабис етиштириш учун лицензия нархи қарийб 700 млн сўмлиги маълум бўлди

Ўзбекистонда каннабисни гиёҳвандлик воситалари ва психотроп моддаларни ишлаб чиқариш ва тайёрлаш билан боғлиқ бўлмаган саноат мақсадларида етиштиришга рухсат берилганди. Гап таркибида 0,2 фоизгача миқдорда тетрагидроканнабинол гиёҳвандлик моддаси мавжуд бўлган ўсимлик толаси ва уруғи ҳақида кетмоқда.

Spot’нинг хабар беришича, 4 декабрь куни Президент Шавкат Мирзиёев саноат каннабиси етиштириш ва қайта ишлаш учун лицензия олишда давлат божи ставкаларини тасдиқловчи қонунни имзолади. Бунга Normа эътибор қаратди.

Лицензия Қишлоқ хўжалиги вазирлиги томонидан берилади. Бож миқдори:

• етиштириш учун — БҲМнинг 3000 баравари (669 миллион сўм);
• импорт учун 200 баравари (44,6 миллион сўм);
• экспорт қилиш учун 200 баравари (44,6 миллион сўм);
• қайта ишлаш учун 200 баравари (44,6 миллион сўм),
• сақлаш учун 200 баравари (44,6 миллион сўм);
• сотиш учун 200 баравари (44,6 миллион сўм);
• сотиб олиш учун 200 баравари (44,6 миллион сўм);
• ташиш учун 200 баравари (44,6 миллион сўм) миқдорида белгиланган.