Британия дунёда биринчи бўлиб Pfizer’нинг коронавирусга қарши вакцинасидан фойдаланишни маъқуллади

Буюк Британия Американинг Pfizer ва Германиянинг BioNTech компанияси томонидан ҳамкорликда ишлаб чиқилган коронавирусга қарши вакцинани оммавий фойдаланиш учун маъқуллаган дунёдаги биринчи мамлакат бўлди. Бу ҳақда Meduza хабар бермоқда.

Мамлакат ҳукумати доридан 40 миллионта доза буюртма қилишга улгурди.

Буюк Британия соғлиқни сақлаш вазирлиги хабар беришича, мамлакатда вакцинани қўллаш келаси ҳафта бошланади. Бир неча ой давом этган клиник синовлардан кейин идора мутахассислари вакцина «хавфсизлик, сифат ва самарадорликнинг қатъий стандартларига мувофиқ келади» деб хулоса қилган.

Аввалроқ Pfizer ва BioNTech ўзининг BNТ1622b вакцинаси тадқиқотларнинг учинчи босқичи якунлари бўйича 95 фоиз самарадорлик кўрсатганини маълум қилганди. Таққослаш учун: Россиянинг «Спутник V» вакцинаси самарадорлиги ўз ишлаб чиқувчилари томонидан 92 фоизга, Америка Moderna компанияси вакцинаси — 94,1 фоизга, AstraZeneca компанияси вакцинаси — 70 фоизга баҳоланган.

Pfizer ва BioNTech вакцинани АҚШда ҳамда Евроиттифоқда рўйхатдан ўтказиш учун ариза берган.

Жонс Ҳопкинс университети маълумотларига кўра, Буюк Британия коронавирус инфекцияси билан касалланиш даражаси бўйича дунёда еттинчи ўринда турибди. Мамлакатда жами 1,6 миллион киши вирусни юқтирган, 59 минг киши вафот этган.