Озарбайжонда Тоғли Қорабоғдаги урушни тўхтатиш бўйича келишувлар бошланган кун — Ғалаба куни этиб белгиланди

Озарбайжонда янги байрам — Ғалаба куни жорий этилди, у ҳар йили 10 ноябрда нишонланади. Бу ҳақда мамлакат президенти Илҳом Алиевнинг тегишли фармонига таяниб, «РБК» хабар берди. Ушбу кунда Озарбайжон, Арманистон ва Россия Тоғли Қорабоғдаги жанговар ҳаракатларни тўхтатиш бўйича келишувларни бошлаган.

Президент Алиев ўз фармонида Бокунинг мазкур можарога нисбатан нуқтаи назарини ифода этган бўлиб, унга кўра Арманистон аввал бошидан Озарбайжонга тегишли бўлган ҳудудларнинг бир қисмини эгаллаб олган. Алиев Озарбайжон армиясининг ғолибона ҳаракатларини таъкидлаб ўтган; шунингдек, бир нечта шаҳарлар қўлга киритилган, жумладан, тарихий аҳамиятга эга Шуша шаҳри ҳам.

Мамлакат раҳбарининг маълум қилишича, Ғалаба куни «халқнинг қудрати ва миллий ғурур тантанасига айланган ҳамда давлатнинг обрўси ва келажак тараққиёти учун алоҳида аҳамиятга эга бўлган мислсиз ғалабани абадийлаштиради».

Арманистон эса Озарбайжоннинг Тоғли Қорабоғ ҳудудига эгалик ҳуқуқини рад этиб, Бокунинг ушбу можародан мақсади арман халқини яксон этиш бўлганини таъкидламоқда.

Алиевнинг яна бир фармони билан Хотира куни ҳам ташкил этилган бўлиб, у 27 сентябрь куни нишонланади. Ушбу кунда Арманистон ва Озарбайжон ўртасидаги ҳарбий можаро кескинлашган.

Эслатиб ўтамиз, Россия иштирокидаги музокаралар натижасига кўра, низо томонлари ўт очишни тўхтатишга қарор қилди. 10 ноябрга ўтар кечаси Арманистон бош вазири Никол Пашинян Озарбайжон ва Россия президентлари Илҳом Алиев ва Владимир Путин билан Тоғли Қорабоғда ўт очишни ва жанговар ҳаракатларни тўхтатиш тўғрисида келишув имзолади. Шундан сўнг Арманистонда ушбу битим сабаб норозилик намойишлари бошланди ва у икки ҳафтадан буён давом этмоқда. Битимга кўра, Озарбайжон минтақа ҳудудининг катта қисмини олган. Мухолифат Пашинян «хоинлик» шартнома имзолангани сабабли истеъфога чиқишини талаб қилмоқда.