Қозоғистон пойтахти Нур-Султондан Туркистонга кўчирилмайди. Бу ҳақда мамлакатнинг биринчи президенти Нурсултон Назарбоев «Қозоғистон» телеканалида Туркистон ҳақидаги фильмда берган интервьюсида маълум қилди, деб ёзади «РБК». «Бунга асос йўқ. Лекин шуни таъкидлаш керакки, бу шаҳарнинг тарихи жуда буюк», — деди у.
Собиқ президентнинг аниқлик киритишича, Туркистон мусулмонлар ва бутун турк дунёси учун жуда аҳамиятли жойдир. «Шунинг учун ҳам, эҳтимол, пойтахтнинг кўчирилиши ҳақида фикрлар пайдо бўлар», — дея қўшиб қўйди Назарбоев.
Аввалроқ пойтахтнинг Нур-Султондан кўчирилиши эҳтимоли ҳақида «Platon.Asia» портали хабар берган эди. Мақола муаллифлари маълум қилишича, Назарбоев илгари маъмурий марказни Туркистонга кўчириш ҳақида ўйлаганини тан олган, аммо ўшанда унга шароит тўсқинлик қилган. Шунингдек, муаллифлар ушбу шаҳардаги фаол қурилишлар ва меъморий ёдгорликларнинг қайта тикланиши айнан шу билан боғлиқ деб тахмин қилган.
Назарбоев Қозоғистонни президент сифатида қарийб 30 йил бошқарди ва давлат раҳбари сифатидаги ваколатларини 2019 йилнинг 20 мартида топширди. Ушбу воқеадан кейин сенат спикери бўлган Қосим-Жўмарт Тўқаев президент ваколатларини қабул қилди.
Назарбоев Хавфсизлик кенгаши раҳбари ва Нур отан партияси етакчилигини ўзида сақлаб қолди. Октябрда Тўқаев Назарбоевнинг кадрлар сиёсати бўйича ваколатларини янада кенгайтирди ва мамлакатда вазирларни лавозимга тайинлаш Хавфсизлик кенгаши билан келишган ҳолда амалга оширилиши ҳақида янги фармон чиқарди. ТИВ, ИИВ ва Мудофаа вазирлиги раҳбарлари бундан мустасно.
2015 йил 26 апрелдаги президентлик сайловларида Назарбоев бешинчи бор ғалаба қозонган ва 98 фоиз овоз олган. Унинг президентлик муддати 2020 йилда поёнига етиши лозим эди. Қозоғистон конституциясига кўра Назарбоев Қозоғистоннинг биринчи президенти сифатида президентликка чекланмаган миқдорда ўз номзодини қўйиш ҳуқуқига эга.
Қозоғистоннинг биринчи президенти Нурсултон Назарбоев истеъфога чиққанини эълон қилганидан кейин пойтахт Остона шаҳри номи Нур-Султонга ўзгартирилган, Қарағанда, Чимкент, Павлодар, Уст-Камнегорск ва Петропавловскда Назарбоев номи билан аталган кўчалар пайдо бўлганди. Кейинчалик мамлакатнинг барча вилоятларида биттадан кўчага биринчи президент номини бериш таклиф қилинган.
Истеъфодан кейин Назарбоев рассомлик фаолияти билан шуғулланаётгани, вақтини оиласи ва неваралари билан ўтказаётганлигини билдирган. У мойбўёқда табиат манзараларини тасвирламоқда ва унинг ижод намуналари кейинчалик Қозоғистондаги музейларга жойлаштирилиши мумкин. Собиқ президент дўстлари ва танишлари тавсиясига кўра, 30 га яқин ишларни чизиб тугатганлигини билдирган.
Изоҳ (0)