Президент Шавкат Мирзиёев Ўзбекистон халқ шоири Абдулла Орипов ва халқ ёзувчиси Ўткир Ҳошимов таваллудининг 80 йиллигини, шунингдек, халқ артисти Ботир Зокиров таваллудининг 85 йиллигини тантанали нишонлаш тўғрисидаги қарорни имзолади, деб хабар беради ЎзА.
Ишлаб чиқилган дастурга кўра, 2021 йилнинг март ва август ойларида «Ўзбекистон» халқаро форумлар саройи ва Ўзбек миллий академик драма театрида мос равишда Абдулла Орипов ва Ўткир Ҳошимовнинг хотирасига бадиий-адабий кеча ўтказиш режалаштирилган.
Уларнинг «Танланган асарлар»и, қорақалпоқ, рус, инглиз ва бошқа тилларга таржима қилинган ҳолда чоп этилади, шунингдек, Абдулла Орипов ва Ўткир Ҳошимов замондошлари хотирасида китобини нашрга тайёрлаб, чоп этилади. Шоир ва ёзувчи ҳаётлигида яшаган хонадонларга ёдгорлик лавҳаси ўрнатилади.
Бундан ташқари, Абдулла Ориповнинг ҳаёти ва ижодий фаолияти ҳақида ҳужжатли фильм яратилади, мамлакат театрларида Абдулла Орипов асарлари асосида спектакллар саҳналаштирилади. Тошкентдаги кўчалардан бирига Ўткир Ҳошимов номи берилади.
2021 йил декабрь ойининг биринчи ўн кунлигида Ўзбекистон Халқаро анжуманлар саройида Ботир Зокиров таваллудининг 85 йиллигига бағишланган хотира кечаси ўтказилади. Тошкентда Ўзбекистон халқ артисти Ботир Зокиров номидаги миллий эстрада олий мактаби ташкил этилади, у ерда хонанда хотирасига бағишланган ёдгорлик мажмуаси ва музейи барпо қилинади.
Бадиий академия томонидан Ботир Зокиров ҳайкалини яратиш бўйича танлов эълон қилиниб, у Тошкент шаҳрида белгиланган тартибда ўрнатилади. Ботир Зокиров хонадонига ёдгорлик лавҳаси ўрнатилади.
Шунингдек, Ботир Зокиров таҳсил олган Ўзбекистон давлат консерваторияси жойлашган кўчага Ботир Зокиров номи берилиб, Ўзбекистон давлат филармониясининг Миллий эстрада-симфоник оркестри билан Ботир Зокиров номидаги эстрада оркестрини бирлаштириб, Ботир Зокиров номидаги миллий эстрада-симфоник оркестри ташкил этилади.
Аввалроқ Тошкентдаги Адиблар хиёбонида ўрнатилган Огаҳий, Бердақ, Муқимий, Фурқат, Маҳмудхўжа Беҳбудий, Тўлепберген Қайипбергенов, Александр Файнбергнинг гипсдан ясалган ҳайкаллари бронзага алмаштирилаётгани тўғрисида хабар берилганди.
Изоҳ (0)