Асакада 2020 йилнинг февраль ойида эрини ўлдириш учун 50 минг АҚШ долларига одам ёллаган 1984 йилда туғилган О.Д. қўлга олингани ҳақида хабар берилганди.
Ҳолат юзасидан жиноят иши қўзғатилиб, олиб борилган тергов ҳаракатлари давомида Жиноят кодексининг 25,97-моддаси 2-қисми «и» банди (қасддан одам ўлдиришга тамагирлик ниятида суиқасд қилиш) билан судга оширилган.
Бироқ Жиноят ишлари бўйича Андижон вилоят суди томонидан судланувчи О.Д. ҳаракатлари 25,97-моддаси 1-қисмига қайта квалификация қилишдан ташқари Жиноят кодексининг 57-моддасини (жиноят учун белгиланган жазонинг энг кам қисмидан ҳам камроқ жазо тайинлаш) қўллаган ҳолда 7 йил озодликдан маҳрум қилиш жазоси тайинланиб, белгиланган мазкур жазоси шартлига алмаштирилган ва 2 йил синов муддати берилиши натижасида аёл суд залидан озодликка чиқарилган.
«Xabar.uz»нинг Бош прокуратура матбуот хизмати раҳбари Ҳаёт Шамсутдиновга таяниб маълум қилишича, мазкур жиноят иши Андижон вилоят прокуратурасининг протести ва жабрланувчининг шикояти асосида ЖИБ вилоят суди апелляция инстанциясида кўриб чиқилди.
Унга кўра, судлов ҳайъати томонидан вилоят прокурори протести қисман қаноатлантирилиши натижасида биринчи босқич суди ҳукми ўзгартирилди. Яъни судланувчига нисбатан Жиноят кодексининг 72-моддаси тартибида белгиланган 2 йил синов муддати бекор қилиниб, тайинланган 7 йил озодликдан маҳрум қилиш жазосини ўташи белгиланди ва у суд залидан қамоққа олинди.
Маълум қилинишича, бу О.Д.нинг биринчи марта судланиши эмас. Маҳкума 2010 йил туҳмат қилиш ва 2017 йилда ўзбошимчалик айбловлари билан икки марта судланган. Шунингдек, 2019 йил унга нисбатан қасддан баданга шикаст етказиш аломатлари билан жиноят иши ҳам қўзғатилган бўлиб, фақат тарафларнинг ярашгани муносабати билан иш тугатилган.
Аввалроқ эрини ўлдириб, жасад бўлакларини ҳожатхонага ташлаб юборган андижонлик аёл 10 йилга қамалгани ҳамда Андижонда эрини ўлдириш учун 30 минг долларга одам ёллаган аёлга суд ҳукми ўқилгани ҳақида хабар берилганди.
Изоҳ (0)