Жиноят ишлари бўйича Андижон вилоят судида шишадошини болта билан уриб ўлдирган Б.С.га суд ҳукми ўқилди. Бу ҳақда «Дарё»га вилоят суди судья катта ёрдамчиси Комроншоҳ Расулов маълум қилди.
Таъкидланишича, 2020 йилнинг 30 май куни фуқаро Б.С. Олтинкўл туманидаги «Жалабек» маҳалласи ҳудудида жойлашган пайвандлаш устахонасида бирга ишлаётган шериги Б.Т. билан бирга тушлик қилиши давомида спиртлик ичимлик ҳам истеъмол қилган. Тушликдан сўнг икковлон танишлари — У.Э., А.М. ва Б.М.ни устахонага таклиф қилган.
Базм давомида чақирилган меҳмонлардан бири Б.М. маст бўлиб қолиб Б.С. билан тортишиб қолган ва шеригини «маймун» деб ҳақорат қилган. Танишларининг ажратишига қарамай Б.С.ни ҳақорат қилишда давом этган. Бу ҳам етмагандек, унинг юз қисмига икки маротаба уриб, тан жароҳати етказган. Бундан жаҳли чиққан Б.С. эса устахонада турган ва ўзи фойдаланиб келган болта билан Б.М.нинг юз қисмига икки маротаба урган. Оқибатда Б.М. тан жароҳати олиб, вафот этган.
2020 йил 30 ноябрь куни мазкур ишни кўриб чиққан суд Б.С.ни Жиноят кодексининг 97-моддаси 2-қисми «в» банди (айбдорга аён бўлган ожиз аҳволдаги шахсни қасддан ўлдириш) билан айбли деб топиб, уни 17 йил-у 6 ой муддатга озодликдан маҳрум қилган. Шунингдек, Б.С.га Жиноят кодексининг 96-моддасига асосан жазони ўташи давомида алкоголизмдан мажбурий даволаниш белгиланган.
Изоҳ (0)