Shayx va qirollar rafiqalari qanday soch turmaklarini ma’qul ko‘radi? (foto)

Sharqning go‘zal xonimlari nafaqat chiroyi, kiyinish uslubi, balki soch turmagi bilan ham hamisha e’tiborga sazovor bo‘lib kelgan. Cosmopolitan nashri taqdim qilgan suratlardan qirol va shayxlar rafiqasining soch turmaklari qanday ekanini bilib olishingiz mumkin.

Raniya al-Abdulla

Iordaniya qirolichasi sharqning eng go‘zal xonimlaridan biri hisoblanadi. Uning kiyinish borasidagi didi, obrazning mukammalligiga alohida e’tibor berishi hamisha e’tirof etib kelinadi. Raniya sochini kamdan kam hollarda murakkab usulda turmaklaydi, asosan, oddiy va sipo turmaklarni xush ko‘radi. Uning qiyofasi va turmagidan bu yil 50 yoshga kirishiga ishonish qiyin.

Hayya bint al-Husayn

Iordaniya qirolichasining singlisi, BAA bosh vazirining sobiq rafiqasi Hayya bint al-Husayn qalin va o‘ziga xos rangli soch sohibasi. U ham sochini, asosan, to‘lqin yoki jingalak qilib turmaklaydi.

Amira at-Tavil

“Olovuddin” ertagidagi malika Yasminga tenglashtiriladigan ushbu go‘zal xonim Saudiya shahzodasi al-Valid ibn Talalning sobiq turmush o‘rtog‘i bo‘lgan. U turli turmaklarni xush ko‘radi. Uzun va qalin sochlari esa qanday turmaklanmasin uning husniga yanada ko‘rk qo‘shadi.

Dina Abdulaziz al-Saud

Saudiya shahzodasining rafiqasi, o‘ziga xos uslubi bilan ajralib turuvchi sharq go‘zali Dina Abdulaziz al-Saud sochi ustida tajribalar o‘tkazishdan qo‘rqmaydi. Uning turmagi va uslubida sharq va g‘arbning uyg‘unligini ko‘rish mumkin. Ayniqsa, kalta soch turmagi uni yanada zamonaviy qilib ko‘rsatgan va bu turmak o‘ziga juda ham yarashgan.

Lalla Salma

Mallasoch, jozibador ushbu xonimning jingalak sochlariga ko‘pchilik havas bilan qaraydi. Qirollik oilasi vakili bo‘lgan Lalla tadbirlarda kamdan kam namoyon bo‘lsa-da, uning tabiiy turmakni yoqtirishini bilish qiyin emas.

Dana al-Xalifa

Bahrayn malikasining go‘zalligi tillarda doston. Ushbu xonim Instagram sahifasida @theoverdressed blogini yuritadi. Uning soch turmagiga nazar tashlansa, ortiqcha bachkanaliklarni yoqtirmasligini, tanlov borasida yoyilgan sochni ma’qul ko‘rishini bilish mumkin. Kiyinish borasidagi uslubi bilan esa malika yanada zamonaviy, latofatli ko‘rinadi.