Латвияда коронавирус инфекцияси тарқалиши оқибатида эпидемиологик вазият ёмонлашиши сабабли фавқулодда ҳолат режими 11 январгача узайтирилди, деб ёзади «РБК». Бу ҳақда LETA агентлиги мамлакат бош вазири Кришьянис Кариньшга таяниб хабар берган.
Ушбу қарор республика ҳукумати ва Инқироз давридаги бошқарув кенгашининг қўшма мажлисида қабул қилинган. Ҳукумат раҳбари аниқлик киритишича, Латвияда COVID-19 билан боғлиқ вазият ўта жиддий ва уни яхшилаш учун фуқаролар ўртасидаги мулоқотларни камайтириш керак. Шу муносабат билан, фавқулодда ҳолат режимини узайтириш билан бирга, ҳукумат яна бир қатор чекловларни қўшишга ҳам қарор қилди.
Чунончи, қатнаб ўқиш формати фақат болалар боғчаларида, шунингдек, бошланғич синфлар учун амал қилади. Ҳар бир ўқувчи учун камида 3 квадрат метр майдон ажратилиши зарур. Бундан ташқари, 3 декабрдан ўқув муассасаларининг барча ходимлари ҳимоя ниқобларини тақиши шарт. 4 январдан бу қоида болалар учун ҳам амал қилишни бошлайди.
Барча фуқаролар фавқулодда ҳолат режими пайтида жамоат жойларида, шу жумладан, кўчада ҳам ниқоб тақиши керак. 3 декабрдан дўконлар ҳар бир мижозга хизмат кўрсатиш учун камида 15 квадрат метр майдон ажратиши керак бўлади. Кичик дўконларга одамлар фақат бир кишидан кириши мумкин.
Мамлакатдаги ҳар қандай оммавий тадбирлар тақиқланган, шунингдек, одамлар орасида камида 2 метрлик ижтимоий масофа сақланиши керак. Черковлар ва масжидларда диндорлар кўпи билан 25 кишилик йиғин ўтказиши мумкин. Транспорт стандарт сиғимининг кўпи билан 50 фоизи даражасида тўлиши мумкин.
Латвияда 9 ноябрдан фавқулодда ҳолат режими ўрнатилган эди. Республикада қатъий карантин чоралари 6 декабрда бекор қилиниши кўзда тутилган эди, аммо вазият бу вақт ичида яхшиланмади. Шундан буён бинолар ичида ўтказиладиган барча турдаги оммавий тадбирлар тақиқланган эди. Шахсий тадбирларда 10 кишидан кўп бўлмаган одамлар ва иккитагача хўжалик аъзоларининг йиғилишига рухсат этилган. Барча барлар, тунги клублар, аквапарклар, савдо-кўнгилочар марказлардаги болалар хоналари ёпилган. Савдо-кўнгилочар марказлардаги озиқ-овқат, гигиеник товарлар, хўжалик моллари, шунингдек, дорихоналар, оптика, китоб дўконларидан ташқари аксарият дўконлар ёпилган эди.
Американинг Жонс Ҳопкинс университети маълумотларига кўра, бутун пандемия даврида Латвияда 17 687 киши COVID-19’га чалинган, шулардан 210 нафари вафот этган. Аммо фавқулодда ҳолат режимини жорий қилиш вақтида мамлакатда бор-йўғи 7119 киши касалланган эди.
Мавзуга доир:
Изоҳ (0)