Latviyada koronavirus infeksiyasi tarqalishi oqibatida epidemiologik vaziyat yomonlashishi sababli favqulodda holat rejimi 11-yanvargacha uzaytirildi, deb yozadi “RBK”. Bu haqda LETA agentligi mamlakat bosh vaziri Krishyanis Karinshga tayanib xabar bergan.
Ushbu qaror respublika hukumati va Inqiroz davridagi boshqaruv kengashining qo‘shma majlisida qabul qilingan. Hukumat rahbari aniqlik kiritishicha, Latviyada COVID-19 bilan bog‘liq vaziyat o‘ta jiddiy va uni yaxshilash uchun fuqarolar o‘rtasidagi muloqotlarni kamaytirish kerak. Shu munosabat bilan, favqulodda holat rejimini uzaytirish bilan birga, hukumat yana bir qator cheklovlarni qo‘shishga ham qaror qildi.
Chunonchi, qatnab o‘qish formati faqat bolalar bog‘chalarida, shuningdek, boshlang‘ich sinflar uchun amal qiladi. Har bir o‘quvchi uchun kamida 3 kvadrat metr maydon ajratilishi zarur. Bundan tashqari, 3-dekabrdan o‘quv muassasalarining barcha xodimlari himoya niqoblarini taqishi shart. 4-yanvardan bu qoida bolalar uchun ham amal qilishni boshlaydi.
Barcha fuqarolar favqulodda holat rejimi paytida jamoat joylarida, shu jumladan, ko‘chada ham niqob taqishi kerak. 3-dekabrdan do‘konlar har bir mijozga xizmat ko‘rsatish uchun kamida 15 kvadrat metr maydon ajratishi kerak bo‘ladi. Kichik do‘konlarga odamlar faqat bir kishidan kirishi mumkin.
Mamlakatdagi har qanday ommaviy tadbirlar taqiqlangan, shuningdek, odamlar orasida kamida 2 metrlik ijtimoiy masofa saqlanishi kerak. Cherkovlar va masjidlarda dindorlar ko‘pi bilan 25 kishilik yig‘in o‘tkazishi mumkin. Transport standart sig‘imining ko‘pi bilan 50 foizi darajasida to‘lishi mumkin.
Latviyada 9-noyabrdan favqulodda holat rejimi o‘rnatilgan edi. Respublikada qat’iy karantin choralari 6-dekabrda bekor qilinishi ko‘zda tutilgan edi, ammo vaziyat bu vaqt ichida yaxshilanmadi. Shundan buyon binolar ichida o‘tkaziladigan barcha turdagi ommaviy tadbirlar taqiqlangan edi. Shaxsiy tadbirlarda 10 kishidan ko‘p bo‘lmagan odamlar va ikkitagacha xo‘jalik a’zolarining yig‘ilishiga ruxsat etilgan. Barcha barlar, tungi klublar, akvaparklar, savdo-ko‘ngilochar markazlardagi bolalar xonalari yopilgan. Savdo-ko‘ngilochar markazlardagi oziq-ovqat, gigiyenik tovarlar, xo‘jalik mollari, shuningdek, dorixonalar, optika, kitob do‘konlaridan tashqari aksariyat do‘konlar yopilgan edi.
Amerikaning Jons Hopkins universiteti ma’lumotlariga ko‘ra, butun pandemiya davrida Latviyada 17 687 kishi COVID-19’ga chalingan, shulardan 210 nafari vafot etgan. Ammo favqulodda holat rejimini joriy qilish vaqtida mamlakatda bor-yo‘g‘i 7119 kishi kasallangan edi.
Mavzuga doir:
Izoh (0)