Ғарбий Германиядаги Трир шаҳрида автомобиль пиёдалар устига бостириб бориши оқибатида ҳалок бўлганлар сони беш нафарга етди, деб ёзади «Коммерсантъ» полицияга таяниб. Аввалроқ тўрт нафар қурбон ҳақида хабар берилган эди.
«Беш киши, шу жумладан, бир нафар ёш бола ҳалок бўлганини тасдиқлай оламиз», — дейилади маҳаллий полициянинг Twitter’да берган хабарида. Яна бир неча киши жароҳат олган.
1 декабрь куни Трирда автомобиль пиёдалар йўлагида оломон устига бостириб борган. Полициянинг қайд этишича, 51 ёшли ҳайдовчи маст ҳолатда бўлган ҳамда ғазаби ёки тажовузкорлиги тутиб қолган пайтида одамларни босиб кетган. У руҳий хаста бўлиши мумкин. Ҳайдовчи қўлга олинган.
Германия Вазирлар Маҳкамаси расмий вакили Штеффан Зайберт маълум қилишича, ҳукумат «ҳодисадан ҳаяжонга тушган». Канцлер Ангела Меркель минтақа ҳукумати билан алоқада эканлигини билдирди.
Германия пойтахти Берлин шаҳрида 25 ноябрь куни эрталаб мамлакат канцлери Ангела Меркелнинг офиси дарвозасига автомобиль келиб урилганди, унинг ҳайдовчиси қўлга олинганди. Кейинроқ эркакни ҳибсда ушлаб туриш ёки руҳий касалликлар клиникасига жўнатиш учун асос мавжуд эмаслиги сабабли полиция уни қўйиб юборганди.
Изоҳ (0)