Pfizer ва BioNTech компаниялари ўзининг коронавирусга қарши вакцинасини Европа иттифоқида рўйхатдан ўтказиш учун ариза берди, дори маъқулланган тақдирда, Европада йил охиригача фойдаланилиши мумкин бўлади. Бу ҳақда «РИА Новости» компанияларнинг қўшма пресс-релизига таяниб хабар бермоқда.
«Pfizer ва BioNTech 2020 йил 30 ноябрь, душанба куни ўзининг матрицали РНК технологиясига асосланган COVID-19’га қарши BNT162b2 вакцинасини шошилинч рўйхатдан ўтказиш учун расмий ариза топширди», — дейилади пресс-релизда.
Компаниялар аниқлик киритишича, агар Европа дори воситалари агентлиги аризани маъқулласа, «бу BNT162b2’ни Европада 2020 йил охиригача қўллаш имконини беради».
Ҳужжатда айтилишича, Pfizer ва BioNTech вакцинадан Австралия, Канада, Япония ва дунёнинг бошқа мамлакатларида фойдаланишни маъқуллаш учун аризалар тайёрламоқда. Октябрда улар АҚШда вакцинани рўйхатдан ўтказишга ариза берган эди.
Компаниялар қайд этишича, Европа регуляторига тақдим этилган клиник синовларнинг учинчи босқичи маълумотлари вакцинанинг турли ёш, жинс, ирқ ва этник гуруҳлар орасида 95 фоиз самарадорликка эга эканлигини кўрсатмоқда — бутун дунё бўйлаб синовлар иштирокчиларининг 42 фоизи ва АҚШдаги синов иштирокчиларининг 30 фоизи турли этник ва ирқий гуруҳларга тааллуқли бўлган, глобал тестлар қатнашчиларининг 41 фоизи ва Америкадаги синов иштирокчиларининг 45 фоизи 56-85 ёшда бўлган. Синовларнинг 65 ёшдан катта қатнашчилари орасида вакцина 94 фоиздан зиёд самарадорлик кўрсатган.
Ҳужжатда аниқлик киритилишича, вакцинанинг шошилинч рўйхатдан ўтказилиши шуни кўзда тутадики, регулятор «вакцинанинг фойдаси COVID-19’га чалиниш хавфидан юқори» эканлиги ёки йўлиги ҳақида қарор қабул қилиши керак.
Германиянинг BioNTech компанияси ва Американинг Pfizer фармацевтик гиганти ўз вакцинасининг клиник синовлари учинчи босқичи муваффақиятли кечгани ҳақида ноябрда хабар берган эди.
Шундан кейин United Airlines авиакомпанияси коронавирусга қарши Pfizer вакцинасини АҚШ ва Европа омборларида етказишни бошлагани хабар берилди.
Аввалроқ Moderna компанияси АҚШда коронавирусга қарши вакцинани қўллаш учун шошилинч тартибда ариза берган эди.
Аввалроқ АҚШнинг Pfizer компанияси Германиянинг BioNTech компанияси билан биргаликда ишлаб чиқарилган COVID-19’га қарши вакцинанинг самарадорлиги 95 фоизни ташкил этишини маълум қилгани ҳақида хабар берилган эди. Ушбу вакцинанинг дозаси АҚШ учун 19,5 долларни ташкил этади (иккала компонентнинг қабул қилиниши 39 долларга тушади), бошқа бир Америка компанияси Moderna вакцинасининг бир дозаси нархи эса 25-37 долларни ташкил қилади.
Изоҳ (0)