Про-Лига 20-тури доирасида кечган «Нефтчи»—«Турон» учрашувидан (0:1) кейин катта тартибсизлик юзага келди.
Фото: «Championat.asia»
Ўйин тугагач «Нефтчи» футболчилари учрашув бош ҳаками Шавкат Насибуллаев ва унинг ёрдамчиларига ўз норозилигини кескин тарзда билдирди. Аввалига ҳуқуқни муҳофаза қилиш органлари ходимлари футболчиларни тинчланишга чақирди, бироқ вазиятга трибунадан майдонга тушиб келган мухлислар аралашди.
Вазиятларнинг бирида «Нефтчи» футболчиси югуриб келган ҳолда бош ҳакамга оёқ билан зарба берди. Охир-оқибат ҳакамлар майдондан қочиб чиқиб кетишга мажбур бўлди.
Таъкидлаш жоиз, ўйин якунланиши арафасида «Турон» дарвозаси томон берилган зарбадан кейин тўп меҳмонлар ҳимоячисининг билагига тегиб қайтди. Бу вазият учун пенальти берилмагани майдон эгаларини жунбишга келтирди.
Учрашувда Шавкат Насибуллаевга қанотларда Ришат Нугманов ва Дониёр Сайлавов ёрдам берди.
Бу ҳолат бўйича ПФЛ ҳозирча расмий шарҳ бермади. Сўнгги маълумотларга кўра, учрашувни ПФЛ раҳбарияти билан бир қаторда Фарғона вилояти ҳокими Хайрулла Бозоров ҳам стадиондан тўғридан-тўғри равишда кузатиб борган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
