Харобадан чиққан миллионерлар. Камбағал оилада вояга етган таниқли футболчилар

Бугунги кунга келиб, футболчилар дунёнинг энг кўп маош олувчи шахслари ҳисобланади. Роналду, Месси ва Неймар сингари чарм тўп усталарининг бир йиллик даромадига эса исталган бизнесмен ёки миллионер фақат ҳавас қилиши мумкин. Табиийки, улар ўз даромадлари орқали ўзи ва яқинларини тўкин ҳаёт билан таъминлаб қўяди. Бироқ уларнинг аксарияти доимо бундай ҳаёт кечирмаган, ҳатто айримлари ўта қашшоқ оилаларда вояга етиб, қорин тўқлаш учунгина футболга қадам қўйган. Қуйида айнан камбағал оилалардан чиққан энг ёрқин футбол юлдузлари ҳақида ҳикоя қиламиз.

Алексис Санчес

Фаолияти давомида «Барселона», «Арсенал», «Манчестер Юнайтед» сингари гранд жамоаларда тўп сурган «Интер» ҳужумчиси ўта оғир болаликни бошдан ўтказган. Санчес Чилининг кичик Токопиля шаҳарчасида туғилган, отаси балиқчилик қилиб, оиласини тебратарди. Оиланинг ягона даромад манбайи балиқчилик бўлгани учун Алексиснинг онаси Санчес ўқийдиган мактабга фаррош бўлиб ишга киради. Табиийки, ёш ва ҳали кўп нарсани тушунмайдиган Санчесга бу ёқмасди: «Онам мактабни тозалаётганда уни у ерда кўришни ёқтирмаганим учун яшириниб олардим». Шу туфайли у мактаб ва машғулотлардан бўш вақтларида машиналарни ювиб, пул топишга ҳаракат қиларди. Ҳозирда эса ўша машина ювувчи Милан шаҳрида ҳашаматли ҳаёт кечиради. Агар футболчи бўлмаганида Санчес катта эҳтимол билан ота касбини танлаши мумкин эди.

Анхель ди Мария

ПСЖ юлдузи кўмирчилар оиласида дунёга келган. Оила тўғридан-тўғри ўз уйида кўмир сотиш билан шуғулланарди. Бироқ бундан келадиган пуллар фақатгина кун кечиришга етарди, холос. Айнан Анхель 17 ёшида оиласини ушбу машаққатлардан олиб чиқади ва бугунги фаровон ҳаёт сари етаклайди. Ди Мариянинг ҳам отаси изидан кетиши аниқ эди. Боиси отаси унга футболни йиғиштириб, ўзи билан бирга конда ишлашга даъват қилади. Бироқ унинг онаси бунга йўл қўймайди ва ўғлининг футбол ўйнаши учун қўлидан келган барча ишни қилади.

«Реал Мадрид» бош мураббийининг ота-онаси жазоирлик муҳожирлар бўлиб, улар яхши ҳаёт излаб Францияга келиб қолганди. Отаси омборда ишлар, онаси эса уй бекаси бўлган. Зиданнинг ёшлиги эса Марсель кўчаларида тентираш билан ўтган. Оила базўр кун кечирарди. Ҳатто ёш Зиданда футбол ўйнаш учун кеталар ҳам бўлмаган. Зидан бир сафар агар футболчи бўлмаганида, портда ишлаши мумкинлигини айтганди.

Манчестер клублари ва «Ювентус»даги ёрқин ўйинлари орқали мухлислар эътирофига сазовор бўлган Тевесни олти ойлигида онаси ташлаб кетади, 6 ёшида эса отаси отиб ташланади. Шундан сўнг уни ночор яшаши ва ўзининг тўрт нафар фарзанди бўлишига қарамай, холаси ўз қарамоғига олади. Тевеснинг ўзи болалигини шундай эслайди:

«Болалигимда ҳеч қачон кўчага ёлғиз чиқмасликка ҳаракат қилардим, чунки бу ўта хавфли эди. Кечалари бизнинг ҳудудимиз фуқаролар уруши пайтидаги Байрутни (Ливан) эслатарди — ҳайқириқлар, отишмалар ва полиция сиреналари. Деразаларимизга дайди ўқлар учиб келарди, биз эса ерга йиқилиб тангрига ибодат қилардик. Эртаси куни ҳеч нарса бўлмагандек, мактаб ёки машғулотга йўл олардим, кўпинча тунда ўлдирилган жасадларни четлаб ўтишимга тўғри келарди. Атрофимизда ҳаёти спиртли ичимликлар ва гиёҳванд моддалардан иборат бўлган одамлар жуда кўп эди. Улар асосан ўғрилик билан кун кечирарди.

Мактабдан бўш вақтларда дўстларим билан эртадан то кечгача тўп тепардик. Бизда ҳатто шахсий тўп бўлмасди, шунинг учун уни ижарага олардик. Пойабзалим шу қадар оёғимни сиқардики, бора-бора оёқ бармоқларим ўсишдан тўхтади. «Майдон»имизда ўйнаш эса ўта хавфли иш эди. Чунки у ер ифлос шприслар ва синган шишалар билан тўлиб тошганди. Биз Coca-Cola ёки чўнтак пуллари учун ўйнардик. Ғалабадан кейин ютуққа нон ёки бирор егулик олиб, майдоннинг ўзида уни паққос туширганимизни яхши эслайман».

Шу тариқа Тевеснинг олдида икки йўл бор эди: футбол ёки безорилик. Карлос биринчи варианти танлади ва ҳеч қачон бундан афсусланмади.

Криштиану Роналду

Роналду Португалиянинг Мадейра оролида камбағал оилада дунёга келади. Онаси ошхонада ишларди, отаси эса ичкиликка ружу қўйиб, деярли пул топмасди. Дастлаб онаси Кришнинг туғилишини эшитиб, уни аборт қилдирмоқчи бўлади. Боиси оила шундоқ ҳам қийналиб яшарди. Аммо у сўнгги паллада фикрини ўзгартиради ва Роналдуни дунёга келтиришга қарор қилади. Шу тариқа дунёдаги энг яхши футболчи пайдо бўлади ва айнан у бутун бошли оилани қашшоқликдан олиб чиқади. Роналду болалигидан футбол билан яшарди, бунга қисман бўлса-да, унда бошқа ўйинчоқларнинг йўқлиги ҳам сабаб бўлган. Ҳозирда Роналду худди эртаклардагидек ҳаёт кечиради: ҳашаматли уйлар, меҳмонхоналар, машиналар, самолётлар ва ҳоказо. Бироқ бир кам дунё деганларидек, Роналду интервьюларидан бирида кўзига ёш олиб, шундай деганди:

«Етти ёшимда отамга Майкл Жексонники сингари ҳашаматли уйим бўлишини айтдим, шунда у менга орзулар орзу бўлиб қолаверишини ва фақат бойларгина бунга эришиши мумкинлигини айтди. Мен улғайдим, ҳозир эса орзум амалга ошди, лекин афсуски, отам буларни кўрмади».

Мавзуга доир: «Аборт қилдирмоқчи бўлганман, бироқ Худо Криштианунинг туғилишини хоҳлаган». Роналдунинг онаси ҳақида кичик ҳикоя