Expat Insider 2020 ҳисоботига кўра, мигрантларнинг яшаши учун энг яхши шаҳар номлари маълум қилинди. Рўйхат бошидан Валенсия, Аликанте ва Лиссабон ўрин олган, деб ёзади «Korrespondent.net».
Тадқиқот муаллифлари дунёнинг 181 давлатида истиқомат қиладиган 173 миллат вакиллари бўлган 15 мингдан ортиқ одам ўртасида сўров ўтказган. Респондентлар 66 шаҳарни муҳим кўрсаткичлари билан баҳолаган: яшаш сифати, молиявий жиҳати ва турар жой арзонлиги, шаҳар ва иш ҳаёти.
Шундай қилиб, Испаниянинг Валенсия шаҳри яшаш сифати ва унинг қиймати кўрсаткичи бўйича энг яхши дея тан олинган. Сўровда иштирок этганларнинг 90 фоизи шаҳарда яшашни ижобий баҳолаб, тиббий хизматдан фойдаланиш осонлиги, дам олиш учун имкониятларининг кўплиги ва ажойиб об-ҳавосини алоҳида таъкидлаган.
Шунингдек респондентлар ўзларининг молиявий жиҳатлари, уй жойларнинг арзонлигидан мамнун ва маҳаллий аҳолининг самимийлигини қайд этган. Шаҳарда яшашнинг камчилиги сифатида ишга жойлашишдаги муаммолар кўрсатиб ўтилган.
Аликантеда эса мигрантларнинг бештадан тўрттаси ўзини худди уйидагидек ҳис қилади, шунингдек, бирор бир респондент Лиссабондаги шахсий хавфсизлик бўйича ёмон гап айтмаган.
Бундан ташқари, етакчилар рўйхатидан Панама-Сити, Сингапур, Малага, Буэнос-Айрес, Куала-Лумпур, Мадрид ва Абу-Даби ўрин олган. Рўйхат охирида эса (57-66-ўринлар) Гонконг, Дублин, Сантьяго, Йоханнесбург, Париж, Найроби, Милан, Сеул, Рил ва Салимия жойлашган.
Эслатиб ўтамиз, июль ойида Numbeo портали яшаш учун энг қиммат ва энг арзон мамлакатлар 2020 йилги рейтингини эълон қилганди. Ўзбекистон ушбу мамлакатлар рейтингида 6-ўринни эгаллаган. 2019 йилда Тошкент яшаш учун энг яхши шаҳарлар рейтингида Душанбени ортда қолдирган эди.
Изоҳ (0)