Туркманистонда қоғозни тежаш учун босма нашрлар бирлаштирилади

Туркманистонда 2021 йилдан бошлаб баъзи босма газета ва журналлар бирлаштирилади, улар рақамли форматга ўтказилади, қоғоз кўринишдаги нашрларга обуна эса фақар пенсионерлар учун қолдирилади. Бу қоғоз ва пулни тежаш, шунингдек, бир хил маълумотни такрорловчи нашрларни қисқартириш учун амалга оширлади. Бу ҳақда ORIENT агентлигига таяниб, «Интерфакс» хабар берди.

Президент Гурбангули Бердимуҳамедов 26 ноябрь куни ўтказилган ҳукумат йиғилишида бу таклифларни маъқуллаган ва ОАВни электрон форматга ўтказишни тезлаштириш бўйича топшириқ берган. Президентнинг сўзларига кўра, бу туркман ОАВларини рақамлаштиришнинг йўналишларидан бири саналади, рақамлаштиришнинг мақсади эса ОАВларни замонавий стандартлар даражасига олиб чиқиш ҳисобланади.

ORIENT агентлигининг ёзишича, «мамлакатда чиқадиган газета ва журналларнинг асосий қисми энди электрон версияга эга бўлгани ва электрон обуна имконияти мавжудлиги сабабли, уларнинг қоғоз тиражлари ва мазмунан ўхшашлиги кун тартибига чиқди». Агентликнинг қўшимча қилишича, интернет ва мобил дастурларнинг ривожланиши билан газеталарни ўқиш чарчатадиган бўлди, уларнинг савдоси пасаймоқда, реклама берувчилар ҳам босма матбуотдан интернетга ўтишни бошлади.

Шу сабабли мамлакат ҳукумати мавзу жиҳатдан ўхшаш нашрларни бирлаштиришга ва шу орқали пулни тежашга қарор қилди. «Mugallymlar gazeti» («Ўқитувчилар газетаси») ва «Türkmen dili» («Туркман тили») газеталари таҳририятларини биринчи нашр номи остида бирлаштириш таклиф этилмоқда. Шунингдек, «Watan» («Ватан») ва «Galkynyş» («Қайта туғилиш») газеталари бирлаштирилади ва бу 120 тонна қоғозни тежашга имкон беради. «Diýar» ва «Қайта туғилиш» журналларининг бирлаштирилиши 3,7 тонна қоғозни тежашга имкон беради.

Хабар берилишича, бирлаштирилаётган нашрлар ходимлари ишдан бўшатилмайди.

Агентликнинг қўшимча қилишича, газета ва журналларнинг нархи бироз оширилади. Нафақахўрлардан ташқари барча 2021 йилда нашрларнинг фақат электрон талқинига обуна бўлиши мумкин.

Ашхободдаги почта бўлими ходимларининг 2021 йил учун Туркманистондаги газета ва журналларга обуна бўлиш иштагидаги кишиларга тушунтиришича, ярим йил учун электрон обуна 60 манат (Туркманистон Марказий банки курси бўйича тахминан 17 доллар) туради. Бунда обуна фақат улгуржи амалга оширилади — бирданига Туркманистонда чиқадиган барча газета ва журналларга. Улар қаторидан 21 та марказий ва ҳудудий газета ҳамда саккизта журнал ўрин олган.

Барча даврий нашрларни ўқиш имконияти махсус дастур орқали берилади. Дастурни смартфон ёки компьютерга ўрнатиш керак бўлади.

Рус тилида нашр этиладиган «Нейтралний Туркменистан» газетасининг ярим йиллик обунаси пенсионерлар учун қоғоз шаклида 18 манат (тахминан 5 доллар) туради.