Бутун дунёда коронавирус инфекциясига чалинганлар сони 61 миллион кишидан ошди. Бу ҳақда вирус тарқалишини реал вақтда кузатиб келаётган Жонс Ҳопкинс университети маълумотларида келтирилган.
28 ноябрь ҳолатига кўра, дунёда COVID-19 қурбонлари сони 1 441 936 кишига етган, 39,4 миллиондан ортиқ бемор соғайган.
Касалланганлар сони 5 миллиондан ошган давлатлар қаторидан АҚШ, Ҳиндистон ва Бразилия ўрин олган.
Қўшма Штатлар коронавирусга чалинганлар сони бўйича дунёда етакчи — 13 062 364 киши. Мамлакатда ҳозирга қадар 264 684 киши коронавирус оқибатида вафот этган, 4,87 миллион бемор соғайган.
Касалланганлар сони бўйича иккинчи ўринда Ҳиндистон кетмоқда. Мамлакат соғлиқни сақлаш вазирлигининг маълумотларига кўра, ўтган бир сутка ичида яна 41 322 кишида COVID-19 тасдиқланган. Ҳиндистонда пандемия бошланганидан буён коронавирусга чалинганлар сони 9,3 миллион кишидан ошган, 136 200 киши коронавирус қурбонига айланган.
Бразилия эса 6,2 миллиондан ортиқ касалланганлар билан рўйхатнинг учинчи поғонасидан жой олган. Мамлакатда ўтган бир сутка ичида яна 34 мингдан ортиқ одамда коронавирус аниқланган, ҳозирга қадар Бразилияда 171 974 киши коронавирус оқибатида вафот этган.
Маълумот учун, дунёда коронавирусга чалинганлар сони 5 ноябрь куни 48 миллион, 9 ноябрь куни 50 миллион, 14 ноябрь куни 53 миллион, 26 ноябрь куни эса 60 миллион кишидан ошганди.
Изоҳ (0)