Migrantlar yashashi uchun eng yaxshi shaharlar reytingi e’lon qilindi

Expat Insider 2020 hisobotiga ko‘ra, migrantlarning yashashi uchun eng yaxshi shahar nomlari ma’lum qilindi. Ro‘yxat boshidan Valensiya, Alikante va Lissabon o‘rin olgan, deb yozadi “Korrespondent.net”.

Tadqiqot mualliflari dunyoning 181 davlatida istiqomat qiladigan 173 millat vakillari bo‘lgan 15 mingdan ortiq odam o‘rtasida so‘rov o‘tkazgan. Respondentlar 66 shaharni muhim ko‘rsatkichlari bilan baholagan: yashash sifati, moliyaviy jihati va turar joy arzonligi, shahar va ish hayoti.

Shunday qilib, Ispaniyaning Valensiya shahri yashash sifati va uning qiymati ko‘rsatkichi bo‘yicha eng yaxshi deya tan olingan. So‘rovda ishtirok etganlarning 90 foizi shaharda yashashni ijobiy baholab, tibbiy xizmatdan foydalanish osonligi, dam olish uchun imkoniyatlarining ko‘pligi va ajoyib ob-havosini alohida ta’kidlagan.

Shuningdek respondentlar o‘zlarining moliyaviy jihatlari, uy joylarning arzonligidan mamnun va mahalliy aholining samimiyligini qayd etgan. Shaharda yashashning kamchiligi sifatida ishga joylashishdagi muammolar ko‘rsatib o‘tilgan.

Alikanteda esa migrantlarning beshtadan to‘rttasi o‘zini xuddi uyidagidek his qiladi, shuningdek, biror bir respondent Lissabondagi shaxsiy xavfsizlik bo‘yicha yomon gap aytmagan.

Bundan tashqari, yetakchilar ro‘yxatidan Panama-Siti, Singapur, Malaga, Buenos-Ayres, Kuala-Lumpur, Madrid va Abu-Dabi o‘rin olgan. Ro‘yxat oxirida esa (57-66-o‘rinlar) Gonkong, Dublin, Santyago, Yoxannesburg, Parij, Nayrobi, Milan, Seul, Ril va Salimiya joylashgan.

Eslatib o‘tamiz, iyul oyida Numbeo portali yashash uchun eng qimmat va eng arzon mamlakatlar 2020-yilgi reytingini e’lon qilgandi. O‘zbekiston ushbu mamlakatlar reytingida 6-o‘rinni egallagan. 2019-yilda Toshkent yashash uchun eng yaxshi shaharlar reytingida Dushanbeni ortda qoldirgan edi.