Butun dunyoda koronavirus infeksiyasiga chalinganlar soni 61 million kishidan oshdi. Bu haqda virus tarqalishini real vaqtda kuzatib kelayotgan Jons Hopkins universiteti ma’lumotlarida keltirilgan.
28-noyabr holatiga ko‘ra, dunyoda COVID-19 qurbonlari soni 1 441 936 kishiga yetgan, 39,4 milliondan ortiq bemor sog‘aygan.
Kasallanganlar soni 5 milliondan oshgan davlatlar qatoridan AQSh, Hindiston va Braziliya o‘rin olgan.
Qo‘shma Shtatlar koronavirusga chalinganlar soni bo‘yicha dunyoda yetakchi — 13 062 364 kishi. Mamlakatda hozirga qadar 264 684 kishi koronavirus oqibatida vafot etgan, 4,87 million bemor sog‘aygan.
Kasallanganlar soni bo‘yicha ikkinchi o‘rinda Hindiston ketmoqda. Mamlakat sog‘liqni saqlash vazirligining ma’lumotlariga ko‘ra, o‘tgan bir sutka ichida yana 41 322 kishida COVID-19 tasdiqlangan. Hindistonda pandemiya boshlanganidan buyon koronavirusga chalinganlar soni 9,3 million kishidan oshgan, 136 200 kishi koronavirus qurboniga aylangan.
Braziliya esa 6,2 milliondan ortiq kasallanganlar bilan ro‘yxatning uchinchi pog‘onasidan joy olgan. Mamlakatda o‘tgan bir sutka ichida yana 34 mingdan ortiq odamda koronavirus aniqlangan, hozirga qadar Braziliyada 171 974 kishi koronavirus oqibatida vafot etgan.
Ma’lumot uchun, dunyoda koronavirusga chalinganlar soni 5-noyabr kuni 48 million, 9-noyabr kuni 50 million, 14-noyabr kuni 53 million, 26-noyabr kuni esa 60 million kishidan oshgandi.
Izoh (0)