Ўзбекистон Президенти Шавкат Мирзиёев 20 ноябрь куни Тошкентда тиббиёт ходимлари ва педагоглар билан учрашгани тўғрисида хабар берилганди. Учрашувда мамлакат раҳбари фуқаролар таълим ва соғлиқни сақлаш тизимидан норози эканлигини алоҳида таъкидлаб ўтган. Шунингдек, Президент мактаб директорлари ва поликлиника раҳбаларининг ишлаш усулларидан норози эканлигини билдирган, деб ёзади «Gazeta.uz».
«Тошкентда тиббиёт соҳасида академия, илм маскани борми? Бор. Иккинчидан, Тошкентда 60га яқин республика тиббий муассасалари борми? Бор. Яхшими-ёмонми, 150та поликлиника, турли йўналишлар бўйича шифохоналар борми? Бор. Охирги 3,5 йил сизлар билан бирга ишлаяпмиз, шу йилларда одамлар тиббиёт соҳасида нимадандир рози бўла олдими, йўқми? Иккинчидан, академиянинг, республика муассасаларининг куч-қудратидан, имкониятидан амалда фойдаланиляптими? Сирдарёга, Наманганга ёки Тошкент вилоятига нисбатан одамларни рози қиляпмизми, йўқми? Менинг ўйлашимча, саволга ижобий жавоб йўқ. Ўзгарамизми, йўқми? Ўзгарсак, қандай ўзгарамиз? Тик туриб, белимизни маҳкам боғлаб пойтахтдаги 3 миллион халқни рози қила оламизми, йўқми, деган савол мени қийнайди», — дейди Президент.
«Қарор чиқди, вазирни алмаштирдик, бошқармага ўзим ишонган инсонни бошлиқ қилиб тайинладик, тизимни ўзгартиряпмиз. Тошкентда қачон натижа бўлади? Энди сизлар — ижросизлар. Қасамёд қилгансизлар (Гиппократ). Бошқа соҳаларда қасамёд йўқ. Ушбу қасамёдингизга лойиқ бўла оласизми? Уддалай олишларингга ишонаман. Мендан нима талаб қилинади? Қандай қилиб ишлаш услубларингизни ўзгартира оласизлар?», — дейди Президент.
Шавкат Мирзиёев режалар катта эканини айтиб, тиббиёт ходимлари, худди ўқитувчилар сингари, 1000 доллар миқдорида иш ҳақи олиши кераклигини билдирди.
«Оддий муаллим 1000 доллар иш ҳақи олмаса, у ишга келиши керак эмас. Шифокор ҳам худди шундай, 1000 доллар олмаса, эртага уйга бориб боласини, набирасини қандай боқади? Қилишимиз мумкинми? Мумкин. Тинчлик, осойишталик керак, бир-биримизни тўғри тушунишимиз керак», – дейди давлат раҳбари.
Маълум қилинишича, Тошкент шаҳрида 23 минг нафар ўқитувчи бор, 500 та вакант мавжуд. Тиббиёт соҳасида 498 та вакант жой бор.
«Иш керак деймиз, лекин мана иккита соҳада ҳам 1000 та вакант турибди. Нега? Бюрократия. Сизларда эркинлик йўқ. Тошкент шаҳрида қандай қилсак бўладики, шу икки тизимга мукаммал озодлик, масъулият, жавобгарлик бериб, болаларимизни яхши ўқицак?» – деди Президент.
Шунингдек, Президент хусусий ва давлат поликлиникаларидаги бош шифокорларнинг ишини таққослаган. Унинг сўзларига кўра, хусусий касалхоналарнинг раҳбарлари худди менежердек ишлайди ва деярли бўш вақти йўқ.
«Агар 5 дақиқа бўш вақти бўлиб қолса, улар янгилик ўқийди… билим олишга интилади. Давлат касалхоналарида бош шифокор соат 09:00 да келади, 17:00 да кетади. Мактаб директори 09:00 дан 18:00 гача нима иш қилади, фойдали иш коэффиценти (ФИК) қанақа? Тиббиёт ходимининг ФИКи қанақа? Ҳамма бир хил эмаску. Яхши ва ёмонлар бор. Яхшиларни олиб, ёмонни ўргата оламизми? Оламиз», — дейди Шавкат Мирзиёев.
Аввалроқ Шавкат Мирзиёев кўпчилик мамлакатдаги тиббий хизматлар сифатидан норози эканлигини танқид қилганди.
Изоҳ (0)