O‘zbekiston Legatum jahon mamlakatlari farovonlik reytingida 100 talikdan o‘rin oldi

Legatum Institute tomonidan har yili tuziladigan Legatum Prosperity Index dunyo reytingida O‘zbekiston 102-o‘rindan 97-o‘ringa ko‘tarildi.

Mamlakatlar 9 mezon bo‘yicha taqqoslanadi: iqtisodiy darajasi, biznes muhiti, davlat boshqaruvi samaradorligi, ta’lim, sog‘liqni saqlash, xavfsizlik va shaxsiy erkinlik, shuningdek, ijtimoiy kapital va ekologik muhitni rivojlantirish mezonlari.

Yangilangan reytingda O‘zbekistonning eng zaif tomonlari hali ham ekologik muhit (157-o‘rin), shaxsiy erkinlik (147-o‘rin) va davlat boshqaruvi samaradorligi (136-o‘rin) hisoblanadi.

Shu bilan birga, mamlakatning kuchli tomonlari ijtimoiy kapital (20-o‘rin), sog‘liqni saqlash (43-o‘rin) va xavfsizlikdir (52-o‘rin).

O‘zbekiston birinchi marotaba ushbu reytingda 2010-yilda paydo bo‘lgan va 109-o‘rinni egallagan, 2019-yilda esa 102-o‘ringa ko‘tarilgan.

Avvalroq O‘zbekiston World Happiness Report baxtli mamlakatlar reytingida uch pog‘ona ko‘tarilgani, Toshkent esa aholisi eng optimist shahar deb topilgani xabar berilgandi.