Сирдарёда 31 ёшли аёл ва унинг вояга етмаган 3 нафар фарзанди ис газидан заҳарланиб вафот этди
Сирдарё вилоятининг Ховос туманида 25 ноябрь куни бир оиланинг тўрт нафар аъзоси ис газидан заҳарланиб вафот этди. Бу ҳақда «Дарё»га Бош прокуратура матбуот хизмати хабар берди.
Маълум қилинишича, туманнинг «Дўстлик» МФЙ, Хиёбон кўчасида яшовчи 31 ёшли аёл З.Н. ва унинг 10 ёшли ўғли Ш.Қ. қўлбола усулда ясалган печдан чиққан ис газидан кучли заҳарланиб, уйида вафот этган.
Шунингдек, аёлнинг 7 ва 3 ёшдаги яна икки нафар ўғли ис газидан заҳарланиб, Ховос тумани тиббиёт бирлашмасининг жонлантириш бўлимига ётқизилган. Улар 26 ноябрь куни жонлантириш бўлимида вафот этган.
Ҳолат юзасидан Ховос тумани прокуратураси томонидан терговга қадар текширув ўтказилмоқда.
Аввалроқ Нукусда ижарада яшаётган 4 нафар талаба қиз, Янгийўлда бир оиланинг 5 нафар аъзоси ис газидан заҳарлангани хабар берилган эди. Бундан ташқари, Навоийда икки нафар ака-ука, Самарқандда турмуш қурганига икки кун бўлган ёш эр-хотин ис газидан заҳарланиб вафот этганди.
